.webp){kind=icon}
Според анализата направена заедно со УНДП за функционирањето на општините во оваа криза, во сите општини во земјава вкупните трошоци за енергија во периодот јануари-септември 2022 година, споредено со истиот период минатата година, се зголемени за една милијарда денари, што во споредба со вкупните приходи, кои изнесуваат околу 40 милијарди денари, претставува голем трошок, изјави во интервју за МИА министерот за локална самоуправа Ристо Пенов.
„Општините овој трошок го префрлиле во намалување на капиталните инвестиции и тоа уште повеќе ги зголемува трошоците. Згора на тоа, според анализата, со дополнителни 800 милиони денари општините ги зголемиле своите долгови и ги издигнале на ниво од 4,2 милијарди денари, што во однос на 40 милијарди приходи е повеќе од 10 проценти“, потенцира Пенов.
Според него, трошоците за енергија на општините се зголемени за една милијарда во однос на лани, а од друга страна капиталните инвестиции се намалени за 1,9 милијарда денари.
„Тоа е речиси дупло. Каде е потрошена таа дополнителна милијарда, во некои неекономски, неефикасни мерки и проекти“, подвлече Пенов.
Тој додаде дека ваквата ситуација говори за лош менаџмент од страна на овие општински раководства годинава.
„Сето тоа говори за еден многу лош менаџерски однос на, не сакам да речам само градоначалниците, туку и советите и управите во општините“, заклучува министерот Пенов.
Тој вели дека за ова прашање не би можело да се предложи брзо решение, затоа што процесот на децентрализација се регулира со закон што се носи со двотретинско мнозинство и во оваа состојба на блокада на парламентот, анализите и предлозите што се прават со УНДП, со УСАИД и со помош на швајцарската амбасада не можат да бидат изнесени во јавност, бидејќи „би изгореле“ во јавната дебата без да можеме да добиеме или да очекуваме некаков ефект во Собранието.
