.webp){kind=icon}
Многу најавуваниот и долгоочекуван снег викендов не падна, барем не во Скопје. Сепак снег има на планините. Температурите викендов беа малку над прогнозираните. Метеоролозите најавуваа дека максималните температури ќе се движат во интервал од -5 наутро до максимални 9 степени, но вчерашниот ден личеше на свежа пролетна недела.
Сето ова оди во прилог на потрошувачката на струја. Во услови на енергетска криза, недостиг од енергенти и нестабилни цени, топлата зима заврши голема работа.
Во тековнава зима се регистрирани заштеди на струја. Тоа делумно се должи на апелите на властите за штедење, делумно на зголемената цена, но најмногу на невообичаено топлото време за овој период од годината. Анализираме колку заштедивме.
Прочитај повеќе
Топлото време ги сруши цените, но видовме ли сè од струјата и гасот?
Цената на струјата во почетокот на 2023-та најниска во последните пет години.
05.01.2023
Енергентите ќе останат скапи до крајот на деценијата
Ефектите од сегашната гасна криза би можеле да траат уште подолго.
02.01.2023
Истраживме како штедат струја македонските компании
Потрошувачката кај домаќинствата годинава е за близу 17 отсто помала од лани.
29.11.2022
Според официјалните податоци за потрошувачката на домаќинствата и малите компании што се снабдуваат со струја на регулираниот пазар, почнувајќи од септември, кога беше прогласена кризната состојба и кога беа предложени мерките за штедење, најмногу заштеди на струја имало во ноември - 18 отсто. Во септември заштедата била девет отсто.
Најмалку сме потрошиле во четвртокот, на Водици
Нашата анализа се однесува на тоа колку трошеа домаќинствата и компаниите во оваа топла зимска сезона и колкави се заштедите споредено со претходните зими, кога во истиот период имало и дневни минусни температури.
Според податоците што ни ги обезбеди прес-службата на ЕВН, најголема потрошувачка овој јануари имало на третиот ден од новата година, по новогодишните празници. Тој ден биле потрошени 21.783 мегават-часа електрична енергија.
Во текот на зимските месеци во 2022 година најмногу струја била потрошена на 25 јануари (вторник). Тогаш биле потрошени 27.406 мегават-часа електрична енергија. Оваа потрошувачка е најголема и во текот на целата година.
Во јануари 2021 година, пак, најголема потрошувачка е регистрирана на 17.1.2021 (недела) и изнесува 26.011 мегават-часа. Тој ден биле измерени температури што оваа зима не сме ги имале ниту еднаш, минимални минус 5°С и максимални 1°С степени, а високата потрошувачка најмногу се должи на денот недела кога струјата цел ден е евтина.
Најмалку струја годинава сме трошеле на Водици, во четвртокот, 17.440 мегават-часа. Лани во зимскиот период најмала потрошувачка имало на 21 февруари (понеделник) и изнесувала 18.759 мегават-часа.
Во текот на летните месеци во 2022 година, најголема потрошувачка на струја имало во среда, на 27 јули. Биле потрошени 15.231 мегават електрична енергија. Во летото 2021 година најмногу струја била потрошена на 29 јуни, 15.956 мегават-часа.
Најниската дневна потрошувачка на струја во земјава во текот на летото 2022 била во петок, на 8 септември (продолжен викенд), кога биле потрошени 11.503 мегавати струја и тоа е најниската потрошувачка во текот на минатата година.
Компаниите штедат
Што се однесува до потрошувачката на компаниите, се обративме до двете компании што се најголеми трговци со струја во земјава и снабдуваат најголем дел од големите компании во земјава, ЕДС (Energy Delivery Solutions) и РЕС (Renewable energy supply).
Од ЕДС за „Блумберг Адрија“ велат дека и компаниите штедат.
„Забележана е очигледна редукција на дневната потрошувачка во текот на октомври 2022, откако два месеца по ред цената на пазарот беше рекордно висока со 495 евра за мегават-час и 379 евра за мегават-час соодветно за август и септември 2022 година“.
„Најголема дневна потрошувачка во балансната група на ЕДС АД, во текот на 2022 година е забележана на 1 февруари 2022, со приближно 1.500 мегават-часа дневна потрошувачка. Најмалата дневна потрошувачка е регистрирана на 30 август 2022, со дневна потрошувачка нешто помала од 600 мегават-часа“.
РЕС е компанија што почна со дејноста годинава и сè уште не располага со споредбени податоци, но велат дека „портфолиото на РЕС изнесува 200 GWh струја на годишно ниво, а вкупната потрошувачка на сите клиенти може да достигне повеќе од 70 MW на час“.
Последните официјални бројки за вкупната потрошувачка за земјава се однесуваат на 2021 година и се објавени во годишниот извештај на Регулаторната комисија за енергетика. Во таа година потрошувачката се зголемила за 6,10 отсто споредено со претходната, 2020 година и изнесувала 6.865 гигават-часа електрична енергија.
Во 2021 година е достигната и рекордна потрошувачка на гас. Таа изнесувала 426 нормални кубни метри или 26,13 отсто повеќе споредено со 2020 година.
