Се зголемуваат шансите за повторно воведување директна авиолинија меѓу Скопје и Љубљана откако македонската влада распиша нов оглас за субвенционирање авиокомпании, а се очекува и словенечката влада да спроведе иста постапка кон крајот на март. Властите, операторите на аеродроми и бизнис-заедницата посакуваат авионско поврзување меѓу двете земји, но крајниот збор ќе го имаат авиокомпаниите, кои ќе треба да пресметаат колку е исплатливо летањето на оваа дестинација.
Словенија ќе понуди субвенции за летови Љубљана - Скопје
Претставници на словенечката влада пред десетина дена соопштија дека имаат намера поодлучно да ја вратат Словенија на картата на европските воздушни врски, по колапсот на „Адрија ервејс“ и пандемијата на ковид-19. Тие претставија програма што предвидува субвенционирани авиолетови во првата фаза, а потоа и можност за воведување национален авиопревозник.
На приоритетната листа за субвенции се десет линии: Виена, Брисел, Копенхаген, Атина, Мадрид, Амстердам, Хелсинки, Прага, Берлин и Скопје. Програмата за обезбедување поголема поврзаност предвидува субвенционирање на 50 проценти од аеродромските такси за три меѓународни аеродроми во Словенија - Брник, Марибор и Порторож - за превозници што ќе воспостават летови на најавените врски. Според надлежните министри, субвенционирањето на овие приклучоци треба да трае три години, за што годишно се планирани 5,6 милиони евра, а вкупно 16,8 милиони евра. Тендерот се очекува да биде објавен на 24 март, по што заинтересираните превозници ќе имаат рок од 30 дена да се пријават.
За програмата реагираше и Стопанската комора на Словенија (ГЗС), која во соопштение за медиумите напиша дека го поддржуваат „секое решение што ќе обезбеди поголема поврзаност на Словенија со светот, особено со дестинации што се стратегиски за нашата земја“. Според нив, најавата на Владата има смисла, бидејќи „податоците покажуваат дека државните субвенции за авиокомпаниите во 2021 и 2022 година биле ефективни“.
Субвенции и во Македонија
Македонското министерство за транспорт и врски неодамна го објави новиот јавен повик за субвенционирање авиолинии, откако првиот, распишан на крајот од минатата година, пропадна поради нецелосна документација на компаниите. На неуспешниот повик понуди доставија авиокомпаниите „Луфтханза“, „Визер“ и „Ејџиан ерлајнс“. На новиот повик условите се исти како на претходниот. Може да се пријават сите заинтересирани авиокомпании што поседуваат уверение за работа издадено од земја-членка на Европската Унија, во согласност со прописите за издавање уверение за работа на авиопревозници, да имаат превезено најмалку 10 милиони патници во 2019 година и да имаат остварено профит од минимум 25 милиони евра во 2019 година.
Прашавме дали има интерес меѓу авиокомпаниите за воведување редовна авионска линија Скопје - Љубљана. Од Министерството за транспорт и врски велат дека интерес има континуирано и дека разговараат со сите заинтересирани авиокомпании за отворање нови линии од скопскиот и охридскиот аеродром, вклучувајќи ја и линијата за Љубљана.
„Јавниот повик е отворен и на него можат да се пријават сите заинтересирани авиокомпании. Во согласност со критериумите од јавниот повик и доставените понуди, комисијата ќе утврди дали е можно да се додели финансиска поддршка и за оваа линија“, велат од Министерството.
Оттаму додаваат дека Македонија нема национален авиопревозник за да може да сама да воспостави редовна авиолинија меѓу двете земји.
„Веќе спомнавме дека се разговара со голем број авиокомпании и доколку некоја од нив во согласност со својот бизнис-модел одлучи да ја воспостави линијата, Министерството за транспорт и врски ќе ја овозможи потребната логистичка помош“, велат од Министерството.
Една од најбараните дестинации
Од операторот на македонските аеродроми „ТАВ Македонија“ велат дека авиолинијата на релацијата Скопје - Љубљана била прометна и една од бараните дестинации од патниците.
„За жал, од 2019 година, со банкротот на ’Адрија ервејс’, ни недостига воздушна врска меѓу Словенија и Северна Македонија. ’ТАВ Македонија’ секогаш се стреми да привлече нови авиокомпании да почнат со работа и да отвораат нови дестинации. Љубљана како дестинација е една од нашите цели и е на нашата листа како дестинација што ја посакуваат патниците. Сепак, што се однесува до отворањето авиолинии, конечната одлука секогаш припаѓа и зависи од авиокомпаниите. Авиокомпаниите, според нивните анализи и деловни стратегии, донесуваат одлуки за пуштање нови воздушни линии“, објаснуваат од „ТАВ Македонија“.
Од операторот велат дека двете земји имаат традиционална долгорочна и обемна соработка во различни области.
„Државните субвенции се голема придобивка за авиокомпаниите и алатка за националните власти за подобрување на воздухопловните пазари во нивните земји. Сепак, во моментов, аеродромите во Скопје и во Љубљана за жал сè уште не се поврзани. Како аеродромски оператор, се надеваме дека авиокомпаниите ќе аплицираат за оваа маршрута, бидејќи тоа е одлична можност линијата Скопје - Љубљана да се врати на мрежата со дестинации од скопскиот и од љубљанскиот аеродром“, велат од „ТАВ Македонија“.
Оттаму велат дека „ТАВ Македонија“ како аеродромски оператор со задоволство би го поздравил повторното отворање на оваа маршрута и би сакале да ја имаат во портфолиото на мрежата со дестинации.
„Како што споменавме, авиокомпаниите се тие што одлучуваат во однос на додавањето нови линии од одредени земји и аеродроми. Како и да е, ’ТАВ Македонија’ ќе продолжи да ги вложува сите свои напори и да инвестира во обезбедување одлични аеродромски услуги за авиокомпаниите, што е голема предност при преговорите за отворање нови маршрути“, велат од „ТАВ Македонија“.
„Блумберг Адрија“ веќе пишуваше дека сè поголемата трговска соработка меѓу Македонија и Словенија ја прави нужна потребата за повторно воспоставување на авиолинијата Скопје - Љубљана. Тоа неодамна на бизнис-форум го порачаа македонски и словенечки стопанственици и ресорните министри од двете држави.
„Се надевам дека тие постапки ќе се спроведат во текот на годината и барем до крајот на 2023 година да имаме авионска линија меѓу Македонија и Словенија на редовна основа“, изјави Војдан Јорданов, претседател на Друштвото на словенечки и македонски компании, кој гостуваше во „Блумберг Адрија ТВ“.
.webp){kind=icon}
Во моментов нема коментари за веста. Биди прв да коментира...