Синдикатите, невладините, општо јавноста се дигна на нозе откако власта реши да оди против Уставниот суд и да овозможи работниците што ќе бидат ангажирани на изградбата на автопатиштата на „Бехтел и Енка“ да работат 60 часа неделно.
Во целата таа врева, никој не се сети на АДА. Првата дигитална асистентка во јавниот сектор базирана на вештачка интелигенција работела 46 часа во 48 часа. Опслужила 1.321 граѓанин и со нив разменила 24.877 пораки. Прашањето ми е: Колку време и колку службеници во јавниот сектор се потребни за да ја сработат работата на АДА и, се разбира, колку ги плаќаме?
МИА
И не само јавниот сектор, и ние во „Блумберг Адрија“ ја тестиравме вештачката интелигенција, конкретно го замоливме ЧетГПТ да ни напише неколку бизнис-плана за инвестиции во Македонија со буџет од 100.000 евра. И ни напиша.
И оваа недела се занимаваме со цените и инфлацијата. Власта ги зголеми замрзнатите цени на зеленчукот. Но, изгледа ни тоа не е решение, затоа што домати и краставици во продажба и натаму нема. Шопска за Велигден нема да јадеме, само мимоза. Околу политиката на замрзнување на цените се огласи и ММФ, не му се допаѓаат ваквите мерки затоа што, како што велат оттаму, ги користат и тие што не треба да ги користат.
А кај нас и со сите замрзнувања, најминималната кошничка за просечно домаќинство чини 700 евра, просечната плата 550 евра. Така покажува статистиката, а според нејзините податоци патиките поскапеле за еден отсто. За продавачите процентот е двоцифрен. Високите цени го влошија квалитетот на животот и на домашните миленичиња. Според нашите аналитичари, ги храниме со сè поевтини производи.
Државата, пак, лани не штедеше на јаглен. Потрошивме големи количества и отстапивме од зелената агенда што претходно ја поставивме.
И компаниите се попретпазливи во однос на целите што претходно си ги поставиле,затоа што високите камати ги одвраќаат од кредити. Земјоделците пак и да сакаат, не можат да дојдат до кредит. Треба да заложат стан во град за да земат кредит за работа на село. А трошоците им растат, па поскапува храната, па расте инфлацијата... и ете сме и оваа недела во маѓепсаниот круг.
.webp){kind=icon}
Во моментов нема коментари за веста. Биди прв да коментира...