Еден бакнеж и магија се стори, пееше порано Владо Јаневски. Сега за магија, само еден потпис фали. Германскиот заменик амбасадор не кажува чиј е потписот, ама оптимист е дека проектот што треба да прави струја од ветер колку два блока од големиот загадувач РЕК Битола, ќе се реализира. Требаше да биде готов за шест години, две отидоа во ветер, во собирање потписи.
Проблеми со собирањето има и државата. Тешко си ги собира парите од Данокот на додадена вредност (ДДВ). Годинава во буџетот влегле 24 милиони евра помалку од лани. Експертите велат дека мора да засили борбата со сивата економија, како прво. А како второ, според анализите, време е за ребаланс кој ќе ги испегла разликите меѓу желбите и реалноста.
Во пеглањето на овие разлики можат да помогнат европските пари, такво е барем хрватското искуство, каде нема грутка земја, а да не се гради нешто со европски пари. Имено, земјата станала поотпорна на кризи по влезот во Европската Унија, се главните пораки од конференцијата „Спојување, инвестирање, развој“ (Merge, Invest, Develop), што во организацијата на „Блумберг Адрија“се одржа во Загреб.
BBA
По европски терк државата ќе ги решава и банките. Се крои нов закон кој ќе има за цел да не се случи нов Еуростандард. Иако, анализата на профитните маржи во земјава покажува дека убедливо на врвот на листата компании со највисоки профитни маржи се наоѓаат токму големите македонски банки. Всушност, на нивните нето профитни маржи можат да им завидуваат многу поголеми играчи од Западот.
Инфлацијата е упорна. На годишно ниво се намалува, но во мај трошоците на живот се зголемиле за 0,4 отсто споредено со април. Дел од храната поевтинува, но главно, цените и натаму си растат.
Во неделата што е веќе за нас анализиравме и какви се дивидендните политики на компаниите и кои акционери годинава ќе добијат повисока дивиденда од лани.
Се занимававме и со американските правила за задолжување заради кои демократите и републиканците со недели беа во преговори. Кај нас не дека нема правила, ама ограничување за задолжување нема. Нема ниту во земјите од Адрија регионот.
За крај, ќе се вратам на Владо Јаневски. На почетокот на деведесеттите пееше: „Пуши пола нација со гаранција“. Триесет години подоцна, ништо не се сменило. Земјава, за жал, е лидер во Европа по бројот нa пушачи, покажува најновата анализа на аналитичкиот тим на „Блумберг Адрија“. Ете, и ние сме биле лидери во нешто.
.webp){kind=icon}
Во моментов нема коментари за веста. Биди прв да коментира...