.webp){kind=icon}
Колку години ќе имате за 30 години? Шеесет, седумдесет, можеби осумдесет години? Денеска сакаме да ве однесеме во 2050 година. Сеедно дали тогаш ќе користиме Твитер или Тредс, даноци ќе мора да плаќаме. За триесет години можеби ќе бидеме земја со силен извоз. За триесет години малкумина од нас ќе се сеќаваат на Силвио Берлускони.
Добро утро, ова се петте работи што треба ги знаете пред да го започнете денов.
Во 2050 ќе работиме помалку
Ова лето сакаме да ве однесеме во 2050 година. Како ќе работиме, што ќе возиме, во какви куќи ќе живееме, како ќе ни изгледаат одморите. Очигледно, сè ќе биде многу „паметно“ и виртуелно.
Во 2050 година, а веројатно и порано, ќе се збогуваме со класичниот осумчасовен работен ден. Ќе работиме помалку. Состаноците ќе се одржуваат некаде во метаверзумот, далеку од физичкиот контакт. Ќе има поголем акцент на тоа луѓето да најдат рамнотежа помеѓу работата и слободното време. Уште повеќе ќе се занимаваме со себе и со меѓучовечките односи. Поради сета технолошка зависност, и дома и на работа, уште повеќе ќе се отуѓиме еден од друг.
Трговскиот дефицит во мај надмина милијарда евра
Вкупната вредност на извозот на стоки во периодот јануари – мај 2023 година изнесува 3,55 милијарди евра и бележи пораст од шест проценти во однос на истиот период од претходната година, соопшти Државниот завод за статистика. Вредноста на увeзената стока во истиот период изнесува 4,60 милијарди евра, што е за 7,5 проценти помалку во споредба со истиот период од претходната година.
Трговскиот дефицит во периодот јануари – мај 2023 година изнесува 1,04 милијарди евра. Покриеноста на увозот со извоз во периодот јануари - мај 2023 година изнесува 77,3 проценти.
Владата целосно да се откаже од данокот на солидарност, бара бизнисот
Владата го испочитувала барањето на бизнис-секторот и го повлекла предлог-законот за данокот на солидарност од собраниска процедура, но тоа, според Стопанската комора на Македонија, не е доволно. Мора да се стопира целосно носењето на овој закон, а ако евентуално повторно се активира постапката за негово донесување, тогаш прво ќе треба да се разговара со бизнисот.
„Комората силно се противи на паушалната употреба на европското знаменце за донесување на законите, зашто се има впечаток дека овој механизам се користи и кога навистина станува збор за европски закони, но и кога станува збор за закони за кои нема општ консензус, па практично се злоупотребува“, изјави извршниот директор на комората, Антони Пешев.
Инстаграм го лансира ривалот на Твитер – Тредс
Платформата на „Мета“ (Meta), Инстаграм (Instagram) официјално ја претстави апликацијата Тредс (Threads), дизајнирана како директен ривал на Твитер (Twitter) и најсериозна закана за социјалната мрежа во сопственост на Илон Маск. На новата апликација корисниците ќе можат да објавуваат текстови и врски, да одговараат или да споделуваат туѓи објави. Тредс им овозможи на корисниците да ги префрлат своите следбеници и имиња од апликацијата Инстаграм, на која се споделуваат видеа и фотографии.
„За седум часа на новата апликација Тредс се регистрирале повеќе од десет милиони корисници“, објави Марк Закерберг, основачот на „Мета“, на својот профил на Тредс. Сепак тоа е мала бројка во споредба со повеќе од 300 милиони корисници на Твитер.
Берлускони на последната девојка ѝ оставил 100 милиони евра
Поранешниот италијански премиер Силвио Берлускони ѝ остави 100 милиони евра (109 милиони долари) на својата партнерка Марта Фашина, во знак на блиските односи меѓу младата пратеничка и тајкунот, кој стана политичар пред крајот на својот живот.
Аманетот за 33-годишната Фашина беше откриен денеска, при отварањето на тестаментот на Берлускони, кој почина минатиот месец. Условите на тестаментот исто така го вклучуваат и планот на поранешниот премиер да им ја пренесе својата деловна империја на своите најстари наследници, според копија од документот што ја виде „Блумберг“.
