.webp){kind=icon}
Граѓаните за пет години од игри на среќа заработиле речиси десет милиони евра, покажуваат податоците кои ги обработи „Блумберг Адрија“, врз основа на извештаи на Управата за јавни приходи (УЈП). Казина, обложувачници, автомат-клубови, лото, наградни квизови и друг вид на обложување се само дел од низата на игри на среќа кои ги имаат граѓаните на располагање низ државата. Анализиравме колку пари заработиле Македонците од обложување и какви се трендовите во смисла на приходување кон државниот буџет.
Според податоците на УЈП, во периодот од 2017 до 2021 година, највисоки заработки од игри на среќа имало во 2018 година. За разлика од оваа година, во 2017 граѓаните имале најниски добивки од обложување и тие се движат од 29.000 до 120.000 евра поединечно. Врвот на листата на рекордни добивки го држи жител од Скопје кој од обложување добил речиси 900.000 евра во еден наврат.
Според податоците од Управата за јавни приходи, скопјани се лидери по бројот на добивки од игрите на среќа, по нив се жителите на Битола, Тетово и Струмица. Најмал број на добивки во периодот од пет години биле исплатени во Куманово, Прилеп и Охрид.
Кој приредува?
За да се отвори една компанија која ќе приредува игри на среќа потребно е да добие лиценца за приредување на посебни игри на среќа која ја издава Владата, стои во законот за Игри на среќа и за забавни игри.
„Приредувач на игра на среќа е трговско друштво со седиште во Македонија на кое му е издадена лиценца, односно дозвола за приредување на игри на среќа и трговско друштво во кое содружник или акционер е Република Македонија и е основано за приредување на игри на среќа“ стои во Законот.
Досега се издадени 35 лиценци на компании кои приредуваат игри на среќа.
За шестгодишна лиценца за автомат-клуб кон државниот буџет се плаќа 78.750 евра, а за казино 600 илјади евра. За тригодишна лиценца за спортска обложувачница, пак, се плаќаат 105 илјади евра. Дополнително, се плаќа месечен надомест од 375 до 675 евра од секој автомат и меѓу 1.700 и 3.000 евра за секоја маса во казино. Обложувачниците и автомат клубовите имаат обврска на државата да ѝ платат 20 отсто од разликата меѓу уплатените и исплатените пари. Во претходната година по основ на лиценци и месечните давачки во буџетот од овие фирми се собрале речиси 40 милиони евра. „Во буџетот се уплатени средства во износ од 2,45 милијарди денари по основ надомест за добивање лиценца и месечна посебна давачка за игри на среќа, утврдена со Законот за игри на среќа.“ појаснуваат од Министерството за финансии.
Покрај приватните компании кои приредуваат игри на среќа, државата како единствен акционер располага и со Државна лотарија која организира игри на среќа на целата територија низ земјава. Според финансискиот план за оваа година Државната лотарија од игри на среќа очекува да собере 17 милиони евра од граѓаните. Анализите од асоцијацијата на приредувачи на игри на среќа покажуваат дека по сите даночни основи и лиценци во државниот буџет во просек на годишно ниво се инкасираат 280 милиони евра. Околу 75 отсто од играчите во просек вложуваат до 200 денари во игрите на среќа, додека 79 отсто од нив се изјасниле дека играат за забава и дружење стои во анализата на Асоцијацијата на приредувачи на игри.
Оваа дејност во последните десет години е една од најуспешните по остварени приходи и добивка. Според податоците во 2012 година профитот на компаниите кои приредуваат игри на среќа изнесувал 140 милиони евра, додека остварената добивка седум милиони евра. Во следните години оваа дејност по остварени приходи и добивка урива рекорди. Во 2021 гпдина приходите се на ниво од 440 милиони евра, додека во 2019 година добивката на казината изнесувала 37 милиони денари.
