Владата се откажува од задолжување преку еврообврзница годинава

Министерот за финансии Фатмир Бесими денеска соопшти дека Владата не планира задолжување преку еврообврзница до крајот на годинава.

„Оваа година повеќе нема да имаме издавање еврообврзница, оттаму што веќе две години се преговара за поволни услови за финансирање на буџетот. Тоа е преку макрофинансиска помош од Европската комисија, потоа преку Светска банка со сто милиони евра и ОБЕ со 150 милиони евра за закони што веќе сме ги поминале во Влада и Собрание. Тоа се 90 милиони евра од Германската развојна банка, како и други потенцијални финансирања, како од Банката на Совет на Европа за буџетска поддршка за наредната година до март и 170 милиони евра од Меѓународниот монтетарен фонд“, рече Бесими.

Тој појасни дека поголемиот дел од одобрените кредити се со над десет години отплата и грејс-период од четири до пет години и каматна стапка за 4 процентни поени во просек пониска споредбено со она што сега се плаќа преку обврзниците.

„Наместо да се плаќаат рати наредните пет години, тие средства ќе ги користиме за проекти. Тоа се програми што две години се преговарани со меѓународните финансиски институции и програми што придонесоа за задржување на кредитиниот рејтинг во услови ка криза, со добивање поповолни услови“, рече министерот Бесими.