Лоша вест за Македонија: Увозот на ЕУ во континуиран пад

Вредноста на извозот и увозот на стоки од ЕУ продолжи да се намалува – извозот паѓа трет квартал по ред, а увозот четврти квартал. Намалувањето на увозот во ЕУ е лош сигнал за македонската економија бидејќи таа е наш главен трговски партнер. 

Во третиот квартал од 2023 година, увозот и извозот на ЕУ се намалија за 4,6 и 1,2 проценти, соодветно, во споредба со претходниот квартал, што доведе до суфицит во трговскиот биланс на ЕУ од околу 18 милијарди евра. Последен пат беше забележан суфицит во третиот квартал од 2021 година (6,9 милијарди евра).

Намалувањето на увозот во ЕУ во третиот квартал од 2023 година главно е предизвикан од  падот на увозот на други произведени стоки (-6,6 милијарди евра во споредба со вториот квартал од 2023 година), машини и возила (-6,2 милијарди евра) и енергија (- 4,7 милијарди евра). Извозот е намален за групата машини и возила (-6,9 милијарди евра) и други производни производи (-2,7 милијарди евра), додека енергијата и хемикалиите се зголемени соодветно за 3,4 милијарди евра и за 3,2 милијарди евра.

„Блумберг Адрија“ веќе пишуваше дека стагнацијата во земјите од Европската Унија се пресликува во македонската економија. Кај нај, извозот во периодот од јули до септември се намали за 3,5 проценти. Тоа, според аналитичарот на „Блумберг Адрија“ Михаил Блажековиќ, е навестување дека падот ќе продолжи и во следниот период.

„Исто така, увозот падна за 10,5 проценти во третиот квартал, што е само дополнителен показател за идниот пад на извозот, со оглед на зависноста на извозот од увозот на инпути за финални извозни производи“, коментира неодамна Блажековиќ.

Тој натаму образложува дека 80 проценти од вкупниот извоз на Македонија оди во земјите на Европската Унија, што доволно зборува за големата зависност на земјата од ситуацијата во Европа.

„Исто така, кога гледаме поединечно, дури 44 проценти од вкупниот извоз на стоки на Македонија оди во Германија. Германската економија танцува на работ од нула отсто, а очекувањата за производството и услугите не предвидуваат подобра ситуација во наредните месеци. Оваа состојба се рефлектира во последните три месеци во извозот на Македонија. Падот на извозот во Германија во однос на третиот квартал од 2022 година изнесува 10,3 отсто“, вели Блажековиќ.

Најзначајниот пад во третиот квартал може да се забележи во падот од 10 проценти на извозот на хемиски производи, што има доста влијание врз вкупниот пад на извозот, имајќи предвид дека хемиските производи сочинуваат 32 отсто од вкупниот извоз на Македонија.

„Во следните месеци очекуваме дополнителен пад и на извозот и на увозот поради натамошниот пад на германските индустриски нарачки, кои паѓаат повеќе од десет месеци, додека индексите на индустриското расположение се далеку од намалување. Германскиот производствен индекс ПМИ е само 40,8, што е доволен знак дека забавувањето во Германија сигурно ќе се прелее и на извозот на Македонија“, наведе Блажековиќ во својата анализа.

Во моментов нема коментари за веста. Биди прв да коментира...

Остави коментар