Вкупните депозити во ноември годинава забележаа месечен раст од 0,9 проценти, којшто се должи на зголемените депозити на двата сектори, со поизразен придонес на корпоративниот сектор, информира Народната банка. Годишниот раст изнесува 7,2 проценти и е резултат на растот на депозитите на двата сектора, со поизразен придонес на секторот „домаќинства“. Во ноември, вкупните кредити се зголемени за 0,3 проценти, во целост како резултат на повисоките кредити на секторот „домаќинства“. На годишна основа, вкупните кредити бележат раст од 5,2 проценти, којшто се должи на зголеменото кредитирање на двата сектора, со поголем придонес на секторот „домаќинства“.
Вкупните депозити на корпоративниот сектор, овој месец, остварија раст од 2,1 проценти на месечно ниво.
„Промената пред сè се должи на повисоките депозитни пари, при позитивен придонес кон растот и на краткорочните депозити во денари и во странска валута, додека долгорочните депозити во денари и во странска валута бележат пад.“, велат од Народната банка.
На годишна основа, растот изнесува 9,8 проценти и во поголем дел е резултат на зголемените краткорочни депозити во странска валута, при дополнителен раст и на останатите компоненти, додека долгорочните депозити во странска валута се намалени.
Во ноември, кредитите на корпоративниот сектор забележаа минимален месечен пад од 0,1 процент, којшто произлегува од намаленото кредитирање во странска валута, во услови на раст на кредитите во денари.
„На годишна основа е остварен раст од 3,8 проценти, во целост како резултат на зголемените кредити во денари.“, велат од Народната банка.
Во ноември 2023 година, вкупните депозити на домаќинствата бележат месечен раст од 0,4 проценти, којшто се должи на повисоките депозитни пари и долгорочните депозити во денари и во странска валута, во услови на пад на краткорочните депозити во странска валута и во денари.
„Растот на годишна основа изнесува 7,1 проценти и произлегува од зголемените долгорочни депозити во странска валута и во денари, како и од зголемените депозитни пари, при пад на краткорочните депозити.“, информираат од Народната банка.
Кредитите на домаќинствата, во ноември се зголемени за 0,7 проценти на месечна основа, како резултат на зголеменото кредитирање во денари и во странска валута, малку поизразено во денари. На годишна основа, овие кредити забележаа раст од 6,5 проценти, во поголем дел поради зголеменото кредитирање во странска валута, при раст и на кредитите во денари.
Според намената на кредитите одобрени на физичките лица, потрошувачките и станбените кредити, како најзастапени категории, бележат месечно зголемување од 0,7 и од еден процент, соодветно, при годишен раст од 6,1 проценти и 10,3 проценти, соодветно.
„Овој месец, кај автомобилските кредити е остварен раст од 1,7 и 8,3 проценти на месечно и на годишно ниво, соодветно, при забележан месечен и годишен пад на кредитите одобрени на кредитни картички за 0,3 и 3,8 проценти, соодветно.“, велат од Народната банка.
Негативните салда на тековните сметки, во ноември, се пониски за 0,7 проценти на месечна основа, додека на годишна основа бележат раст за 4,8 проценти. Кредитите одобрени врз други основи, овој месец, се намалени за 2,3 и 17,8 проценти на месечна и на годишна основа.
.webp){kind=icon}