Стопанственици апелираат изборите да не ја кочат економијата

Претстојните избори ќе ја блокираат домашната економска активност најмалку пет месеци, а оние малку пари што доаѓаа од државниот буџет кон стопанството, ќе бидат ставени под знак прашање бидејќи фондовите ќе бидат практично нефункционални барем до јуни 2024, предупредија денес од Стопанската комора на Северна Македонија.  

Оттаму укажуват дека притоа, најзагрозени ќе бидат микро, малите и средните претпријатија (ММСП).

„Кај нив ваквата ситуација се одразува драматично. Тие вработуваат многу луѓе, од нив зависат многу судбини, треба да поделат плата. Не можат да издржат блокади од 100 дена, плус избори, плус формирање влада и плус почеток на нејзино функционирање. Тоа би значело повеќе од пола година нефункционална држава“, велат од комората.

Според извршниот директор на Стопанската комора, Антони Пешев, државата секогаш треба да има механизми кои ќе и овозможат на економијата да пребродува периоди какви што се изборните.

„Оваа, 2024-та, е година на двојни избори. Ќе имаме скоро повеќе од пет месеци блокиран процес на економска активност. Владата ќе биде во поприлично рестриктирана состојба да влијае врз економијата и она малку пари што доаѓаа од државниот буџет кон економијата ќе бидат ставени под знак прашање. Цениме дека ова е вистински момент да почнеме сериозно да говориме за економијата и за потребата државата да се врати назад на вистинскиот фокус, а тоа е дека без економска активност, без бизнис, без стопанство, не може да постои.“, вели Пешев.

Тој додава дека државата не може да постои само со постоење на администрација.

„Кај нас особено се поддржува администрацијата, за која перманентно говориме дека е премногу непотребна, дека го товари државниот буџет, дека ги товари компаниите. Се мисли за стандардот на луѓето зашто тоа се гласачи, а економијата е ставена на страна – таа треба да преживува во кои било услови и мислиме дека во тој сегмент државата сите овие години направи навистина малку.“, вели Пешев.

Тој посочува дека иако се вели дека македонската економија е жилава и дека успева да се справи со сите проблеми станува навредливо она што се случува сите овие години.

„Навредлива е особено комуникацијата со владејачките гарнитури, не говорам само за последната, во серија владејачки гарнитури - овде говорат едно, а низ годините и низ владеењето се случува нешто сосема друго.“ истакна Пешев.

Според него, нашата економија издржува само зашто изминативе години имаше големо пренасочување на активностите кон надвор.

„Значаен дел од извозот денеска ги спасува и стабилноста на денарот и функционалноста на компаниите. Не случајно Комората сака да помогне што е можно повеќе компании да работат за извоз, да не зависат од моменталните случувања во државата кои особено во сегментот на мали, микро и средни претпријатија се одразуваат драматично. Затоа цениме дека таму се штетите и тие може да бидат поголеми од апсолутниот износ колку што ќе им се даде на партиите во процесот на избори.“, вели Пешев.

Тој додава дека без оглед на тоа дали ќе има промена на власта или старо-нова влада, политичките партии ќе треба да седнат ида се договорат за тоа каде оди оваа држава генерално.

„Економската активност е можеби и веќе замрена. Со почетокот на оваа година Владата ќе влезе во некаков си блокирачки режим, едни со други ќе се блокираат, тоа сме го имале како искуство. Не знам дали сакаат да слушаат. Имаме некакви решенија, но се испостави дека кога говориме ние, сите климаат со глава, а кога треба да спроведат, како да не сме се договориле. И тоа е она што не фрустрира.“, вели Пешев.

Според претседателката на Центарот за микро, мали и средни претпријатија, Габриела Кулебанова, во нашата држава акцентот е ставен на политиката, а потоа на се останато, но тоа треба да се смени зашто политичарите и политиката не се најбитни, како што рече, туку најважна е економијата. Таа се осврна и на потребата од „вистински статистички податоци“ кои засега, нагласи, не постојат. Потсети и дека бизнисот бара регистар како единствениот регистар за населението.

„Ние како бизнис заедница секогаш сме барале вистински статистички податоци кои што ги немаме и бараме регистар од каде ќе црпат податоци сите институции, да не играат „пинг-понг“ меѓу себе за да ги пренесат своите податоци од една кон друга институција. Треба да имаме, секој како што има матичен број, социјален број и во АВРМ и во УЈП – регистар што ќе се користи секаде за да ги смалиме манипулациите во рамки на државата токму заради сите анализи што се прават. За да направиме анализа, ни требаат вистински точни податоци.“, вели Кулебанова.

Во моментов нема коментари за веста. Биди прв да коментира...

Остави коментар