.webp){kind=icon}
Вооружените напади што го отежнуваат транспортот преку Црвеното Море, рута која меѓудругото важи за главна артерија во трговските врски меѓу азиските земји и Европа може да влијаат и врз трговијата меѓу Македонија и Кина, која од година во година е во континуиран пораст. Во периодот јануари-ноември 2023 година трговските односи меѓу двете земји достигнаа вредност од над милијарда евра, од кои само 94 милиони евра отпаѓаат на македонскиот извоз во Кина, а останатите 925 милиони евра се увоз од Кина во земјава. Всушност, во изминативе години Кина од незначаен трговски партнер прерасна во земја која редовно е на листата пет најголеми трговски парнери на Македонија.
Бродскиот транспорт и до Кина поскапува поради тоа што компаниите се приморани да бараат нови рути и се одолжува времето на испораките. Можен домино ефект од овие трендови е зголемување на цените на производите и побавен пласман на планираните количества на пазарите.
Мапа на бродови кои пловат и низ теснецот кој ги поврзува Европа и Азија преку Црвеното Море/ Извор:Блумберг терминал
„Блумберг Адрија“ веќе пишуваше дека списокот на производи што Македонија ги увезува од Кина е долг и разновиден. На списокот има буквално сѐ. Нова и стара облека, техника, електронски делови, автомобили, автоделови, машини, играчки, памук, синтетика, хемиски производи и разни прехранбени производи (риба, шеќер...).
Ако е донекаде разбирливо зошто увезуваме техничка опрема и текстил од азискиот економски гигант, изненадува тоа што на полиците на македонските маркети редовно може да се најдат дури и зеленчук и сирење произведени во Кина. Спротивно на тоа, списокот на производи што Кина ги увезува од Македонија е многу пократок (феролегури, вино, мермер, делови за шински возила, електромотори, хемиски производи и слично).
