.webp){kind=icon}
Македонските вина се претставуваат на најпознатиот меѓународен саем за вино и жестоки пијалаци „Провајн 2024 (ProWein 2024), кој од 10 до 12 март се одржува во Дизелдорф, Германија. На триесеттото издание на „Провајн 2024“ учествуваат македонските винарници: „Тиквеш“, „Камник“, „Венец“, „Мовино“, „Имако“, „Попов“, „Милев“, „Стоби“, „Парагон“, „Сопот“ и „Лазар“.
„Овој настан е важен за сите винарници што се стремат кон глобално присуство на своите производи, но и место каде што се претставуваат новитетите и последните трендови во индустријата. Присуството на македонските винарници е значајно за позиционирањето на земјата и на поединечните брендови на меѓународно ниво“, вели Елена Младеновска Јеленковиќ, извршна директорка на здружението „Вина на Македонија“.
МИА
Посетителите на „Провајн 2024“ имаат одлична можност да се запознаат со автентичните вкусови и ароми на македонските вина и да уживаат во нивниот квалитет, кој го освојува интернационалниот пазар. За време на саемот се организираат ексклузивни дегустации од страна на професионалци што креираат неповторливи искуства за присутните.
„На овој саем македонските винарници имаат единствена можност пред светот да го покажат своето врвно вино, кое е плод на вековната традиција и современите технологии за производство на вина со неспоредлив квалитет и карактер“, потенцираат од здружението.
Годинава учеството на саемот се реализира со поддршка од Министерството за земјоделство, шумарство и водостопанство, кое во целост го покрива заедничкиот штанд на македонските винарници. Дополнително, винарската визба „Тиквеш“, како најголема винарница од нашата земја, е претставена на посебен штанд, претставувајќи ги своите производи со традиција и докажан квалитет.
