НБРМ ја задржа каматната стапка на 6,30 отсто

Народна банка на Македонија не почна со олеснување на монетарната политика. Каматната стапка на благајничките записи и во текот на летото ќе остане на досегашното ниво од 6,30 отсто. Ова е одлуката која вчера ја донесе Комитетот за оперативна монетарна политика.

„На седницата беше оценето дека тековната поставеност на монетарната политика е соодветна на условите во економијата. Со тоа, каматната стапка на благајничките записи останува на нивото од 6,30 отсто, а каматните стапки на депозитите преку ноќ и на 7 дена на нивоата од 4,20 отсто и 4,25 отсто, соодветно. Понудата на благајнички записи на редовната аукција е исто така непроменета и изнесува 10 милијарди денари“, стои во соопштението на НБРМ.

При носењето на одлуката главен акцент бил ставен на потребата од стабилизирање на инфлацијата и инфлациските очекувања на потрајна основа.

„Инфлацијата во мај 2024 година умерено забрза и изнесува 4,5 отсто на годишно ниво, при позитивен придонес за растот како од базичната инфлација, така и од останатите компоненти“, велат од НБРМ.

Сепак, динамиката на инфлацијата во мај не отстапува од патеката на движење предвидена во рамките на пролетните проекции на Народната банка и ѝ натаму останува очекувањето дека до крајот на оваа година просечната инфлација ќе изнесува 3,5 отсто.

„Во однос на цените на примарните производи на берзите, најновите прогнози се ревидирани умерено нагоре, односно се очекува нивен помал пад оваа година, а нестабилниот геополитички контекст и натаму создава неизвесност и нагорни ризици за следниот период. Оттука, беше оценето дека е потребна натамошна претпазливост при водењето на монетарната политика“, соопшти централна банка.

ББА прогнозира блага релаксација на политиката наесен

И аналитичарите на „Блумберг Адрија“ прогнозираа дека НБРМ ќе ја задржи досегашната политика и дека нема да има промена на каматната стапка. Според нашите аналитичари, монетарната политика во земјава побавно ќе се релаксира во споредба со земјите од регионот, а првото намалување на каматите може да се очекува по летото. Како причина за ова, аналитичарката на „Блумберг Адрија“, Марина Петров Савиќ го наведе инфлаторниот притисок кој почна уште во март, а во мај се засили.

„Инфлаторниот притисок е обновен поради цените на храната што се должи на ефектот од пролетната сезона и завршувањето на владините мерки за ограничување на цените на храната. Оттука зголемените бројки ќе го одложат намалување на стапките од страна на НБРМ“, стои во анализата.

Аналитичарката Марина Петров-Савиќ понатаму истекна дека наесен кога ќе почне стабилизацијата на цените на услугите ќе почне и намалувањето на референтната камата, но тоа на почеток ќе биде поблаго.

„Очекуваме дека НБРМ ќе почне со поблаги чекори, од 0,15 до 0,30 процентни поени, па дури потоа, со подобри процени на влијанијата и релаксација на инфлаторните очекувања, ќе премине на намалување на стапката од по 0,5 процентни поени за што има простор со оглед на тоа дека сегашната каматна стапка од 6,3 отсто е релативно висока“, рече аналитичарката Петров-Савиќ.

НБРМ очекува дека тековното ниво на каматните стапки, заедно со досегашните промени кај задолжителната резерва и преземените макропрудентни мерки ќе придонесат за натамошно забавување на инфлацијата и за задржување на стабилноста на девизниот курс.

Остануваат ризиците од надворешното окружување

Според НБРМ, состојбата на девизниот пазар е стабилна и движењата се поволни. Нивото на девизните резерви на крајот на мај изнесува 4.293,6 милиони евра, што е соодветно за задржување на стабилноста на курсот на домашната валута. Движењата на девизниот пазар и натаму се поволни и придонесуваат за интервенции со нето-откуп на девизи од страна на Народната банка од почетокот на годината, при солиден прилив на девизи и на менувачкиот пазар. Во однос на последните расположливи податоци од надворешниот сектор, трговскиот дефицит во април 2024 година е во согласност со очекувањата од априлскиот циклус проекции. Остварувањата на менувачкиот пазар во вториот квартал, заклучно со втората декада од мај засега се близу до проектираните нето-приливи од приватните трансфери.

Економскиот раст во првиот квартал на 2024 година малку забрза, во согласност со проекциите на Народната банка, но поумерено од очекувањата. Реалниот раст на домашната економија изнесува 1,2 отсто на годишна основа, при натамошен раст и на квартална основа.

„Високофреквентните податоци за вториот квартал од 2024 година со кои се располага упатуваат на висок реален годишен раст на прометот во вкупната трговија, а индустриското производство бележи мал пад. Сепак, расположливоста на податоците е ограничена и не е доволна за попрецизна оцена. Во однос на ризиците за растот во следниот период, тие и натаму постојат и се поврзани пред сè со случувањата во надворешното окружување, но и со интензитетот на остварувањето на домашните инфраструктурни проекти“, се вели во соопштението.

Во монетарниот сектор, според првичните податоците за мај 2024 година, депозитниот потенцијал на банките и натаму расте, слично на очекувањата, при малку посилен кредитен раст од проектираниот.

„Општо земено, најновите остварувања кај макроекономските показатели засега се близу до очекувањата од последните проекции, но условите за водење на монетарната политика и натаму се неизвесни. Потребно е натамошно внимателно следење на динамиката и факторите кај инфлацијата, како и претпазливост во однос на водењето на макроекономските политики коишто влијаат врз побарувачката во економијата, вклучително и на пазарот на трудот. Народната банка и натаму е подготвена да ги употреби сите неопходни инструменти и да презема соодветни мерки со коишто ќе се придонесе за задржување на стабилноста на девизниот курс, стабилизирање на инфлациските очекувања и за ценовна стабилност на среден рок“, наведува централната банка.

Во моментов нема коментари за веста. Биди прв да коментира...

Остави коментар