.webp){kind=icon}
И на овонеделната седница ФЕД нема да го промени правецот на монетарната политика. Очекуваме референтната каматна стапка да се задржи на истото ниво, со многу веројатен почеток на намалувањето дури наесен оваа година.
Има повеќе фактори кои укажуваат дека нема да има промена на каматната стапка. Индексите на доверба на менаџерите во индустрискиот и услужниот сектор се на стабилни нивоа. Во последните месеци, инфлацијата изнесува околу 3,4 отсто и не успева да се намали пониско поради затегнатиот пазар на труд и стабилната економија. Според последното читање, просечната часовна заработка на работниците пораснала за 4,1 отсто на годишна основа, што е малку над очекувањата.
Кога ќе ја погледнеме кривата на обврзниците, таа сепак е инвертирана, иако во помала мера од минатата година. Распонот помеѓу двегодишната и десетгодишната се намали и моментално е-40 базични поени, што е двојно пониско од минатата година, што ни кажува дека полека доаѓаме до нормализирање на кривата на американските обврзници.
Очекуваме ФЕД да продолжи да ја одржува реториката на одлуки „водени од податоци“, но и внимателно да ги следи пазарите на капитал. Пазарите значително ги поместија очекувањата во однос на јачината на економијата и почетокот на намалувањето (веројатноста изнесува нешто над 50 отсто) го гледаат дури наесен оваа година.
Очекуваме дека инфлацијата ќе флуктуира нагоре и надолу, но со тенденција на опаѓање, имајќи предвид дека „заостанатите“ сегменти на инфлација, како што е цената на издавањето станови, треба постепено да се намалува.
Исто така, претседателските избори во единаесеттиот месец би можеле да одиграат улога кај ФЕД, кои веројатно ќе ја следат линијата на најмал отпор во тој месец и ќе ги прескокнат промените на монетарната политика. Сепак, во комбинација со мало забавување на личната потрошувачка и растот на БДП, наесен очекуваме почеток на намалување на каматните стапки, со тенденција референтната каматна стапка да опадне за 50 базични поени до крајот на годината.
