Народната банка ги објави податоците за зелените кредити за првиот квартал од 2024 година, каде што се забележува годишен раст од 26,37 проценти. Во споредба со крајот на 2019 година, кога започнаа собирањето и објавувањето на овие податоци, зелените кредити се зголемени за 2,8 пати. Станува збор за заеми наменети за проекти што поддржуваат одржливи еколошки цели или цели што придонесуваат за зелената транзиција во општеството, како што е развивање нова еколошка технологија.
![](/data/images/2024-07-08/65176_krediti_iff.png?t=1720426324)
Според податоците на Народната банка, на крајот од првото тримесечје од 2024 година, состојбата на зелените кредити во билансите на банките изнесува 19.860 милиони денари. За споредба, на крајот на 2019 година тие изнесувале 7.176 милиони денари. Заклучно со првото тримесечје од 2024 година, состојбата на кредитите одобрени на компаниите изнесува 18.771 милион денари, додека на домаќинствата изнесува 1.089 милиони денари.
„Расте и уделот на зелените во вкупните кредити, иако сѐ уште е на ниско ниво. Oд крајот на 2019 година, заклучно со првото тримесечје од 2024 година, учеството на зелените во вкупните кредити е зголемено од 2,2 отсто на 4,5 отсто“, посочуваат од Народната банка.
Оттаму додаваат дека поради ризиците од климатските промени на долг рок, Народната банка зазеде проактивен став и како една од своите стратегиски цели ја постави зголемената свесност за климатските промени и придонесот кон зелената одржлива економија. Преку низа активности, нашата централна банка придонесува за поттикнување на зеленото финансирање, вклучувајќи ги и монетарните мерки.