Парите од Будимпешта ќе бидат префрлени неделава

Владата избра да се задолжи со заем од Унгарија, а не со издавање еврообврзница заради пониската камата и заштедата по тој основ, изјави денеска министерката за финансии Гордана Димитриеска-Кочоска која денеска го потпиша во Будимпешта Договорот за заем со унгарската Експорт-импорт банка. Претходно, минатиот месец Собранието го усвои Законот за задолжување на РС Македонија со заем кај унгарската банка. „Обезбедуваме 500 милиони евра за буџетска поддршка, за поддршка на локалниот развој преку проекти во општините, како и за поддршка на економијата. Тоа беше повеќе од потребно за нашата економија, која во првиот квартал имаше многу слаба економска активност и бараше мерки кои ќе направат раздвижување и забрзување на економската активност, изјави министерката.

Заемот, како што истакна, се обезбедува по поволни услови, со рок на отплата од 15 години, со вклучен грејс период од 3 години и каматна стапка од 3,25 проценти.

„Каматните стапки по кои би ја добиле оваа сума на меѓународниот пазар е околу 6 отсто и тоа е голема заштеда по буџетот по овој основ, односно заштеда на годишно ниво од околу  14 милиони евра. Дополнително и рочноста дава предност и помал ризик од потреба за рефинансирање“, рече Димитриеска-Кочоска, која додаде дека ваквите услови се резултат и на политиките што ги води Владата, а за што, како што посочи, минатата недела добивме потврда и од кредитната агенција „Фич“, којашто според неа има значајна улога за каматните стапки коишто ги добива земјата при задолжување на финансиските пазари.

Делот  од заемот кој ќе оди кон компаниите ќе биде пласиран исто така по поволни услови, што ќе влијае на отпочнување на еден инвестициски цисклус во приватниот сектор од над 500 милиони евра со кој ќе се обезбедат повисоки стапки на економски раст.

Во моментов нема коментари за веста. Биди прв да коментира...

Остави коментар