Административците бараат зголемување на платите за 6.000 денари

Административците излегоа на предупредувачки протест, со барање за потпишување колективни договори и исплата на 30 проценти додатоци на плата. Денеска, утре и задутре се протестира по половина час пред министерствата, а в петок на едночасовен протест ќе се одржи пред Министерството за финансии.

Синдикатот на вработените во управата и правосудството (УПОЗ) на протест ги повика вработените од министерствата за животна средина, за дигитална трансформација, за шумарство и водостопанство, за правда, за култура и туризам, за економија и труд и за транспорт. Протестираат и вработените во Државниот завод за статистика и во Државниот архив.

„Почнуваме денеска бидејќи се одржува седница на Владата и апелираме на денешната владина седница да се стави точка на дневен ред, со што ќе се најде начин да се обезбедат средства од буџетот за решавање на овој долгогодишен проблем на вработените“, изјави Трпе Деаноски, претседател на УПОЗ.

МИА

Тој вели дека во изминатите шест месеци, од изборот на новата влада, имало средби со сите ресорни министри, подготвени биле колективни предлог-договори, кои потоа со поддршка на ресорните министри биле испратени до Министерството за финансии.

„Овие колективни предлог-договори беа поднесени до Министерството за финансии пред носењето на буџетот за 2025 година, но, од неразбирливи причини, Министерството за финансии не одобри средства за нивно потпишување“, рече тој.

Почетната плата на вработените што протестираа денеска изнесува 25.010 денари.

„Просечната плата во овие институции е околу 29.000 денари, а просечната плата исплатена на ниво на држава изнесува 42.124 денари. Додатокот што го бараме од 30 отсто значи дека вработените би добиле 6.000 денари зголемување на плата, но и покрај тоа, сите вработени повторно ќе бидат под просечната плата на државата. Ова наше барање е старо повеќе од четири години. За овој додаток на плата сме протестирале и сме штрајкувале со години, но, за жал, ниту една влада досега не излезе во пресрет на нашите барања“, изјави Деаноски.

Тој рече дека иако не постои никаква уставна, ниту законска пречка, да се потпише колективен договор во која било институција, нивната намера не е да му нанесат штета на државниот буџет, туку „преку дијалог со Владата да се најдат средства за потпишување на колективните договори во рамките на буџетот“.

Влада: Протестот не е организиран во согласност со законот

Портпаролката на Владата, Марија Митева, денеска на прес-конференција изјави дека не се исполнети законските услови за протестот. Таа додаде дека Владата е партнер на сите и е отворена за сите предлози и сугестии.

МИА

„Секој штрајк треба да биде организиран во согласност со Законот за работни односи и колективните договори. Треба да биде најавен во согласност со законот, да биде спроведена и постапката за помирување, која наедно е задолжителна, и да се определат нужни работи што  мора да се вршат. Бидејќи за жал ниту еден од овие постојни законски услови не е исполнет, тоа говори за незаконитост на штрајкот и отвора силен сомнеж дека овој штрајк е политички мотивиран“, рече Митева.

Според Митева, изненадува фактот првиот чекор што го презема УПОЗ наместо дијалогот, кој е прв демократски начин и метод за функционирање.

„Интересно е што изминативе години овој синдикат како да молчеше за ова прашање и со жалење мораме да истакнеме дека отворено се сомневаме дека зад ваквиот чекор стои политичка заднина на синдикатот, кој дејствува како продолжена рака на партиите, кои досега за жал ги злоупотребуваа правата на работниците. Како влада гледаме реално на работите и не сме задоволни од нивото на платите во администрацијата, но повторувам дека дијалогот е вистинскиот начин за наоѓање решение“, изјави Митева.

На новинарско прашање дали е можно да се реализира покачување на платите за 30 проценти како што бара синдикатот, Митева одговори дека секогаш се отворени за дијалог и како влада ќе пристапат кон наоѓање решение.

Во моментов нема коментари за веста. Биди прв да коментира...

Остави коментар