Година на згаснати компании во Македонија и Европа

Со забревтано темпо расте бројот на згаснати трговски друштва во С.Македонија годинава, а во некои дејности бројот на банкроти во осумте месеци од годинава веќе го надминува вкупниот број избришани фирми во минатите години. Таков е примерот во секторот земјоделство, шумарство и рибарство во кој заклучно со август, годинава од евиденцијата на Централниот регистар биле избришани 179 трговски друштва, што е повеќе од вкупниот број од 158 избришани фирми од оваа дејност во цела 2020 година.

Евиденцијата на регистарот открива дека најмногу избришани фирми од почетокот на 2022 година до сега има во трговијата на големо и мало, преработувачката индустрија, хотелиерството и рестораните, транспортот и градежништвото. Истовремено има и пад на бројот на новоосновани трговски друштва и доколку нема значителни промени во состојбата на економијата извесно е дека годинава може да биде рекордна по малиот број нови фирми.

Слична состојба и во ЕУ

Регистрациите на нови бизниси во ЕУ се намалени за 1,2 проценти во вториот квартал од 2022 година во споредба со претходниот квартал, објави вчера „Еуростат“. Од почетокот на годината, новите регистрации бележат пад, при што во првиот квартал е забележан пад од 2,3 проценти, во споредба со четвртиот квартал од 2021 година. Што се однесува до стечаите, тие повторно се зголемуваат четврти квартал по ред.

„Зголемувањето започна во третиот квартал на 2021 година, по забележливиот пад од 11 проценти во вториот квартал од 2021 година во споредба со првиот квартал од 2021 година. Најновите податоци покажуваат дека во вториот квартал од 2022 година, прогласите за стечај се зголемиле за 2,2 проценти. во споредба со првиот квартал од 2022 година“, соопшти „Еуростат“.

Во однос на дејноста, само градежништвото и информациско-комуникацискиот сектор забележаа намалување на бројот на стечаи во вториот квартал од 2022 година, во споредба со претходниот квартал (-12 и -4 проценти, соодветно). Од друга страна, кај останатите дејности е забележан пораст на стечаите. Транспортот и складирањето (+16 проценти) и образованието, здравството и социјалните дејности (+12 проценти) се дејностите со најголем пораст на бројот на стечаи во вториот квартал од 2022 година во споредба со претходниот квартал.

Во моментов нема коментари за веста. Биди прв да коментира...

Остави коментар