Компании

Државата им должи на фирмите близу 200 милиони евра

Автор: Наташа Хаџиспиркоска Стефанова

04. Август 2022, 21:06

Најголем дел од долгот се неплатени фактури и невратен ДДВ

За една година долгот се зголемил за 50 милиони евра

Долгот расте пред претстојната, најтешка зима за македонското стопанство

Државата им должи на фирмите близу 200 милиони евра

HNB

Наташа Хаџиспиркоска Стефанова

Државата им должи на фирмите речиси 200 милиони евра. Податоците ги објави Министерството за финансии и се однесуваат на првата половина од оваа година. Обврските на државата кон фирмите растат цела година, а лани во истиот период биле 146 милиони евра што значи само за една година долгот на државата кон фирмите се зголемил за над 50 милиони евра.

Стопанствениците велат дека најголем дел од долгот на државата се неплатени фактури за извршени работи, но и обврски за невратен ДДВ.

Долгот на државата кон македонските фирми расте во услови на тешка криза. Компаниите се оставени сами на себе да се снајдат и да обезбедат струја за зимата за која и Владата призна дека ќе биде најтешка досега. Во моментов на унгарската берза од каде македонските компании најмногу купуваат струја, има денови кога цената  изнесува околу 500 евра за мегават час.

Дел од компаниите работат само ноќна смена, а дел, ако државата не најде начин да им помогне, ќе затворат. За нив, рецесијата е веќе извесна. Ова за компаниите е елементарна непогода и енергетско цунами, изјави неодамна за Блумберг ТВ,  Трајан Ангелоски, претседател на Сојузот на стопански комори.

„Ние очекуваме дека во последниот квартал од оваа година ќе влеземе во рецесија, затоа што со вакви цени на енергентите, не е орджливо. Некои фирми го стопираат производството, некои се адаптираат во ноќен режим, со некои модификации, така што, навистина негативно влијае целата енергетска криза. Не сме погодени од цената на гасот, но тоа се одразува на цената на струјата што пак  доста влијае на нашата работа“, изјави Ангелоски.

Просторот за делување за македонските компании се стеснува и со мерките на НБРМ за зауздување на инфлацијата . Централната банка во четири наврати ја дига референтната камата, а и Европската централна банка го прави истото што ќе предизвика раст и на ЕУРИБОР от  - што на крај ќе ги зголеми каматите за кредитите и за македонските фирми. Зголемување веќе има кај новоодобрените кредити. Каматната стапка на новоодобрените кредити на корпоративниот сектор, во јуни, забележа зголемување од 0,22 п.п. на месечна основа и изнесува 3,68 проценти.

Во насока на заштита на банките од евентуални нефункционални кредити како резултат на несоодветно кредитирање, НБРМ ги задолжи банките да ја зголемат и резервата која ја чуваат за 0,5 отсто до август догодина.

Во вакви услови, кога парите стануваат се поскапи, компаниите бараат државата да го намали притисокот и да се раздолжи со стопанството. До крајот на оваа година, ќе доспеат уште 86,6 милиони евра што државата ќе треба да ги плати на фирмите.

Сите новости од рубриката Бизнис

Бизнис

сите новости од рубриката Бизнис