Компании

Големи играчи од Македонија ‚газат‘ иако е криза

Автор: Владимир Николоски

03. Август 2022, 14:46

Банките уриваат рекорди во добивката

Нафтените компании тријат раце

Големи играчи од Македонија ‚газат‘ иако е криза

Bloomberg

Владимир Николоски

Огромниот пораст на цените на струјата и на природниот гас, како и проблемите во снабдувањето со основни суровини што започнаа со пандемијата од Ковид-19 и се пролонгираа со војната во Украина имаа негативно влијание врз работењето на голем број компании во Македонија. Речиси сите акционерски друштва кои котираат на Македонската берза во своите полугодишни извештаи ги нотираат поскапувањето на енергенсите и војната во Украина како фактори кои ја отежнуваат  работата и предизвикуваат неизвесност. Сепак, финансиските остварувања во првото полугодие од годинава покажуваат дека определени сектори и компании се „имуни“ на овие глобални проблеми. Тие успеваат да ги зголемат приходите и добивката до рекордни нивоа.

Фантастични резултати на познатото банкарско трио

Банкарскиот сектор, а посебно трите големи банки остварија резултати кои покажуваат дека за нив овие „кризни времиња“ се всушност најдобри досега. Имено, „Стопанска банка“ АД Скопје во првата половина од 2022 година оствари добивка по  оданочување во износ од 1.465.381.000 денари (23,8 милиони евра), што е зголемување за 34 проценти во однос на истиот период минатата година. Оттаму укажаа дека првата половина од 2022 година наметнала сериозни долгорочни предизвици на глобално ниво кои особено негативно се рефлектираат врз европската економија, а со тоа и врз домашната економија. 

„Високите цени на енергијата и нафтените деривати заедно со инфлаторните притисоци и пролонгираната Ковид пандемија воспоставуваат нова реалност во економското и севкупното живеење. Како и во секоја криза, економиите и бизнисите се соочени со предизвикот за соодветни прилагодувања од поширок опсег со цел да се обезбеди нивниот континуитет и да се надминуваат последиците од кризата“, соопшти банката.

И покрај овие констатации банката оствари пораст во речиси сите сегменти од работењето.

Од „Комерцијална банка“ неодамна исто така укажаа дека покрај натамошното неповолно влијание на здравствената криза и ризиците поврзани со истата, макроекономските услови во кои банката ќе ја остварува својата активност до крајот на 2022 година се условени и од геополитичките состојби – особено кризата во Украина и нејзините ефекти врз економијата на ЕУ, како и состојбата со достапноста и цената на енергенсите и храната.

Сепак, во првото полугодие од годинава „Комерцијална банка“ забележа одлични резултати. Во периодот од 01.01-30.06.2022 година, банката оствари добивка во износ од 1,12 милијарди денари (18,3 милиони евра), што е зголемување за 36,1 проценти во однос на истиот период минатата година кога добивката изнесувала износ од 828,3 милиони денари (13,4 милиони евра). Банката имаше раст на вкупните приходи од 3,4 проценти и на нето-приходите од камата бележат од 12,6 проценти. Минимален раст од 02 проценти имаше и кај вкупните депозити.

Слична е состојбата и со „НЛБ Банка“ АД Скопје, која во периодот јануари-јуни 2022 година оствари нето добивка во износ од 1.395.014.000 денари (22,6 милиони евра) што претставува зголемување за 23,5 проценти во однос на остварената нето – добивка истиот период претходната година. 

 „Зголемувањето се должи на континуирани продажни активности на кредитните продукти со особен фокус кај домаќинствата, микро, малите и средни претпријатија и зголемен број на корисници на платните сервиси на банката“, соопшти неодамна банката преку Македонската берза.

Големите нафташи успешно пливаат во енергетската криза

Значителен пораст на приходите и добивката остварија и двете најголеми компании од нафтениот бизнис во земјава. „Макпетрол“ АД Скопје во првата половина од 2022 година оствари добивка од 530.647.000 денари (8,6 милиони евра), што е зголемување за два и пол пати во однос на добивката од 209.497.000 (3,4 милиони евра) остварена во истиот период минатата година. Вкупиот приход на компанијата во првото полугодие од годинава изнесува 16,33 милијарди денари, кој е поголем од минатогодишниот за 7,43 милијарди денари, односно остварен е раст од 83,54 проценти.

Оттаму во коментарот на полугодипниот извештај укажаа дека во текот на првата половина од 2022 година работеле во услови на економска криза, која се чувствувала како на локално, така и на глобално ниво.

„Воениот конфликт, енергетската криза и растечката инфлација, неминовно влијаеа и врз работењето на „Макпетрол“ АД. Но, како резултат на посветеноста и ангажираноста на раководството, во текот на кризните месеци друштвото обезбеди непрекинато снабдување со нафтени деривати и природен гас, иако во одредени моменти поради нагло растење на цените на нафтените деривати, друштвото работеше и со загуба“, соопшти компанијата.

Најдобар показател за успешното справување со кризната состојба е што во текот на првата половина од 2022 година на „Макпетрол“ АД Скопје му се приклучиле 132 нови вработени.

 „ОКТА“ АД Скопје во првата половина од годинава оствари добивка од 762,2 милиони денари, што е зголемување во однос на истиот период минатата година кога добивката на компанијата изнесувала 267,7 милиони денари. Приходите од продажба на „ОКТА“ изнесуваат 27.716.000.000 денари во првото полугодие од 2022 година, што претставува зголемување од 182 проценти во однос на истиот период од минатата година.

Оттаму соопштија дека новонастанатите геополитички тензии ја интензивирале енергетската криза во Европа, уште повеќе зголемувајќи ги цените на природниот гас и електричната енергија, што негативно влијае врз потрошувачите и индустријата.

„Постепеното воведување на санкции од страна на ЕУ и ембаргото на нафтата ги натера повеќето европски земји да го намалат па дури и да го прекинат увозот на руски нафтени производи и гас, што предизвика нерамнотежа помеѓу побарувачката и понудата. Овие движења значително ги зголемија цените на суровата нафта и гасот. Во овие околности, државата ги врати од „ладна резерва“ постројките за производство на електрична енергија кои работат на мазут. „ОКТА“ успеа значително да придонесе за обезбедување на потребните количини на мазут, и покрај недостатоците на количини во регионот“, објаснија од компанијата.

Оттаму додаваат дека во споредба со првата половина од 2021 година, на која влијаеа мерките за ограничување на движењето, зголемениот обем и придонес на домашниот и извозниот пазар се должи на закрепнувањето на побарувачката, особено за дизел и керозин.

„Поради работата на електраните во екот на актуелната енергетска криза, има зголемена побарувачка за мазут. Од друга страна, зголемените инфлациски притисоци ги зголемија оперативните расходи за 12 проценти споредено со истиот период минатата година. „ОКТА“ успешно ги надмина предизвиците со кои се соочува во еволуирачкото пазарно опкружување“, соопшти компанијата.

Сите новости од рубриката Анализа

Алкалоид АД Скопје
Компании

Алкалоид АД Скопје

„Алкалоид“ AД Скопје е компанија која работи на производство на лекови, преработка на билни суровини и на производство на козметички и на хемиски производи.

28.06.2022

КОСТАЛ Македонија
Компании

КОСТАЛ Македонија

КОСТАЛ МАКЕДОНИЈА е една од водечките компании на глобално ниво за производство на електронски и мехатронски компоненти за автомобилската индустриј

27.06.2022

Анализа

сите новости од рубриката Анализа