НЛБ Банка со добивка од 22,6 милиони евра за шест месеци

„НЛБ Банка АД Скопје“ во периодот јануари-јуни 2022 година оствари нето добивка во износ од 1.395.014.000 денари (22,6 милиони евра) што претставува зголемување за 23,5 проценти во однос на остварената нето – добивка истиот период претходната година.

„Зголемувањето се должи на континуирани продажни активности на кредитните продукти со особен фокус кај домаќинствата, микро, малите и средни претпријатија и зголемен број на корисници на платните сервиси на банката“, соопшти банката преку Македонската берза.

Заклучно со 30.06.2022 година билансната сума изнесува 106.429.308.000 денари односно се намали за 1.280.171.000 денариили 1,2 проценти во однос на 31.12.2021 година. Паричните средства и паричните еквиваленти изнесуваат 19.109.517.000 денари и бележат намалување од 3 проценти во однос на 31.12.2021. Кредитите и побарувањата од банки бележат намалување од 139.000 денари во однос на 31.12.2021.

Вкупните кредити кај небанкарскиот сектор изнесуваат 67.802.027.000 денари и бележат зголемување од 3,4 проценти во однос на 31.12.2021. 

„Кредитирањето и во двата сектора, домаќинства и нефинансиски правни лица, продолжи да се зголемува и во текот на 2022 година, при што зголемувањето во поголем дел се должи на потрошувачките и станбените кредити кај домаќинствата“, соопшти банката.

Вложувања во хартии од вредност изнесуваат 15.424.700.000 денари и се намалени за 15,9 проценти во однос на 31.12.2021 поради доспевање на домашни и странски државни записи и обврзници. Преземените средства врз основа на ненаплатени побарувања во однос на 31.12.2021 година се зголемени за 41,3 проценти.

Незначително намалување на вкупните депозити 

Вкупните депозити (депозити на комитенти и депозити на банки) изнесуваат 85.910.128.000 денари и во однос на 31.12.2021 година се намалени за 679.040.000 денари или за 0,8 проценти. 

„Надолната промена се должи на намалување на орочените депозити во корпоративниот сектор и домаќинства, со поизразен пад кај домаќинствата. Во анализираниот период, тековните сметки и депозитите по видување бележат поизразен раст кај домаќинствата, а во услови на пад на денарските средства кај корпоративниот сектор“, информираат од банката.

Обврски по кредити се зголемени за 275.714.000 денари заради повисокиот износ на долгорочни кредити од кредитна линија од домашна банка (РБСМ). Акционерскиот капитал и резервите на банката се зголемени 2,5 проценти и изнесуваат 14.417.710.000 денари. Зголемувањето произлегува од распределба на реализираниот годишен финансиски резултат за 2021 година во резервите на банката.

Нето каматните приходи, заклучно со 30.06.2022 година се повисоки за 4,3 проценти споредено со претходната година, при што приходите од камати се повисоки за 2,4 проценти, главно поради повисоки каматни приходи од секторите нефинансиски правни лица и домаќинства додека расходите за камати се пониски за 13,3 проценти главно поради пониски каматни стапки и преструктурирање на изворите во корист на средства по видување.

Нето приходите од провизии се повисоки за 3,6 проценти споредено со претходната година, при што приходите од провизии се зголемени за 13,1 проценти како резултат на зголемени приходи од реализирани трансакции на ПОС терминали и картично порамнување, повисоки приходи од услуги во платен промет во земјата и странство и повисоки приходи од водење трансакциски сметки. Расходите за провизии се зголемени за 27,3 проценти, главно поради повисоки расходи од картично работење кон меѓународните картични системи, а во помала мера поради зголемување на расходите од услуги во платен промет со странство.

Останатите некаматни приходи изнесуваат 397.085.000 денари и се намалени во однос на претходната година, главно поради пониски наплати на претходно отпишани побарувања кај нефинансиски правни лица и домаќинства. 

Вкупните приходи од работење изнесуваат 2.522.841.000 денари и се пониски за 7,1 проценти во однос на претходната година. Вкупните оперативни трошоци изнесуваат 1.106.423.000 денари и се зголемени за 8,2 проценти при што трошоците за вработени се повисоки за 5,7 проценти, трошоците за амортизација се повисоки за 18,1 проценти, останатите расходи од дејност се повисоки за 8,4 проценти во однос на
претходната година.

„Заклучно со 30.06.2022, беа ослободени исправки на вредноста на финансиските средства и вонбилансна изложеност, на нето основа во износ од 82.380.000 денари соодветно на подобрената структура, наплата и квалитет на кредитната изложеност. Исправките на вредност на нефинансиски средства изнесуваат 51.218.000 денари. Бруто добивката на банката заклучно со 30.06.2022 година изнесува 1.550.016.000 денари и е зголемена за 23,5 проценти во однос на претходната година“, соопшти банката.

Очекувања за претстојниот период 

Во претстојниот период се очекува да се одржи макроекономската стабилност на државата, при неизвесен деловен амбиент за реалниот сектор поврзан со нарушувањата на каналите на снабдување, пазарите на енергија и инфлаторните притисоци, велат од банката.

 „„НЛБ Банка АД Скопје“ и понатаму делува во насока на поддршка на приватниот сектор во земјата со што има значаен придонес во макроекономскиот и финансискиот амбиент надржавата. Така и понатаму во фокусот на работењето на „НЛБ Банка АД Скопје“ ќе бидат дигитализацијата и зголемувањето на дигиталната пенетрација на клиентите, поддршката на клиентите преку зајакнување на улогата на контакт-центарот, како и припродажбата на различни банкарски производи, проширување на палетата на производи и услуги и зголемување на квалитетот на услугите со што се очекуваат уште подобри резултати во клучните сегменти од работењето на банката.
Банката во континуитет обезбедува поддршка на стопанството преку проширување на понудата за стартап - компаниите, учество во раните фази од процесот на создавање на стартап-компаниите, како и нивна дигитализација. Дополнително препознавајќи ги ризиците од климатските промени, банката зазеде проактивен став преку дадениот акцент на „зелените кредити“ – кредитирање во области за производство на електрична енергија од обновливи извори, намалување на загадувањето и подобрување на животната средина. Човечките ресурси во банката како главен столб на квалитетното работење, како и на развојот на информативниот систем на Банката и понатаму ќе бидат стратешки цели на банката.“, велат од „НЛБ Банка“. 

Во моментов нема коментари за веста. Биди прв да коментира...

Остави коментар