Најава за директна авиолинија Манчестер - Охрид

Сезонска авиолинија на релација Манчестер - Охрид најавува за следното лето авиокомпанијата ТУИ Ервејс (TUI Airways).

Според објавата во распоредот на авиокомпанијата, летовите ќе се реализираат еднаш неделно, во периодот од 31 мај до 20 септември следната година.

Годинава бројот на летови на сезонските авиолинии е зголемен и на двата македонски аеродрома во однос на лани. На скопскиот аеродром од јануари заклучно со јули се реализирани 457 сезонски летови, за 55 отсто повеќе од лани, кога имало 294 летови, а на охридскиот аеродромот „Свети Апостол Павле“ 831 сезонски лет, што е зголемување за 136 отсто во однос на истиот период лани, кога имало 352 сезонски лета.

Годинава сезонски дестинации до кои авиокомпаниите летаат од скопскиот аеродром се Анталија, Бодрум, Измир, Хургада, Базел, Џеда/Медина, Монастир (Тунис). Во 2021 од Скопје се леташе сезонски за Анталија, Бодрум, Хургада, Базел и Дизелдорф. Од охридскиот аеродром, пак, годинава се опслужуваат сезонски авиолинии и до Тел Авив и Амстердам, како и до Цирих, Ајндховен и Катовице, што беа на располагање и во минатата летна сезона.

Во првите седум месеци од годинава на двата македонски аеродрома се опслужени вкупно 1,3 милиони патници, со 10.622 лета.

Во моментов нема коментари за веста. Биди прв да коментира...

Остави коментар