Државата потрошила две третини од буџетскиот минус за шест месеци

За половина година се потрошени две третини од планираниот дефицит за цела година. Фискалниот совет на Македонија предупредува дека државата мора да се држи до фискалните правила за да може да се реализира дефицитот како што е планиранo со буџетот.

„Буџетскиот дефицит достигна 25,7 милијарди денари (417,9 милиони евра), што во однос на буџетираниот дефицит претставува искористеност од 62 отсто, и истиот тој е повисок од остварениот буџетски дефицит од претходната година за 8,9 отсто“, се наведува во објава на Фискалниот совет на социјалната мрежа Линкдин.

За реализација на проектираниот буџетски дефицит и остварување на фискалните правила ќе мора да се преземат дополнителни мерки за јакнење на одржливоста на јавните финансии, препорачува Советот.

Фискалниот совет предупредува дека функционирањето на светската економија е во многу неизвесна состојба со висока волатилност и раст на протекционизмот и блоковска поделеност.

Најважниот трговски партнер за македонската економија е Европската Унија, која реализираше незначителен раст на економската активност во вториот квартал, што имаше соодветно влијание врз македонската економија, особено на нето-извозот.

„Во согласност со тоа, економскиот раст целосно беше воден од домашната потрошувачка, пред сè од личната, јавната потрошувачка и инвестициите. Кај јавната потрошувачка најголем раст остваруваат расходите за отплата на надворешниот долг од 35 отсто во однос на истиот период од претходната година, додека сите други расходи стагнираат или остваруваат умерен пад“, соопшти Советот.

Фискалниот совет најави дека в понеделник ќе објави опширна анализа за трошењето на буџетските пари во првата половина од годината.

Во моментов нема коментари за веста. Биди прв да коментира...

Остави коментар