Зголемена стапка на банкротирани компании во Македонија

Во услови на голем број предизвици од опкружувањето, во текот на 2024 година бројот на правни лица над кои  е отворена стечајна постапка се зголеми, што предизвика зголемување на стапката на банкротирани правни лица до ниво од 1,5 проценти (1,3 проценти во претходната година), наведуваат од Народната банка во последниот извештај за финансиската стабилност на Македонија за 2024 година. Оттаму додаваат дека тоа е слично на нивоата од пред пандемијата и засега упатува на ограничен ризик од несолвентност на секторот.  

Во кои сектори најмногу згаснуваат, а во кои се раѓаат нови компании?

Во македонскиот корпоративен сектор заклучно со минатата година работеле вкупно 59.909 субјекти, што е благо зголемување во однос на 2023 година, кога во земјава функционирале 59.682 субјекти. Податоците на Народната банка што се базираат на бројот на субјекти што лани доставиле завршни сметки во Централниот регистар покажуваат дека во минатата година има зголемување на бројот на фирми во сите дејности освен во трговијата, транспортот, складирањето и угостителството, каде што има намалување на бројот на субјекти во однос на претходната година.

Убедливо најголем раст имало во дејностите во врска со недвижен имот, стручните, научните и техничките дејности и административните и помошни услужни дејности, каде што бројот на компании се зголемил од 8.736 во 2023 година на 9.308 во 2024 година. Значителен раст на бројот на компании имало и во градежништвото, индустријата и ИКТ-секторот.

Две години по ред во загуба над 18.000 компании

Од вкупниот број компании, лани со добивка работеле 41.679, што е благо зголемување во однос на 2023 година, кога добивка имале 40.867 компании.

Со загуба лани во земјава работеле 18.230 компании, што е намалување во однос на претходната година, кога загуба имале 18.815 компании.

 

Во моментов нема коментари за веста. Биди прв да коментира...

Остави коментар