Како „Македонски телеком“ стаса до дивиденден принос поголем од регионалните конкуренти

Во 2025 година „Македонски телеком“ го насочи фокусот кон дигитализацијата и дигиталната безбедност, како што беше предвидено на почетокот од годината. Тоа не е изненадување, со оглед на тоа што од основната дејност, поради заситеноста на пазарот, компанијата не би можела да оствари значаен раст на приходите во споредба со минатата година.

Главниот адут на кој игра компанијата се развојот и искористувањето на силната инфраструктура, што се гледа во растот на капиталните вложувања (CAPEX) од 61,6 отсто на годишно ниво во првата половина на 2025 година.

Конкретно, вкупните приходи во првата половина од годинава се зголемени за скромни 0,6 отсто во споредба со истиот период лани. Тоа најмногу се должи на растот на приходите од системска интеграција (речиси 57 отсто), како резултат на имплементацијата на проектот за паметно осветлување во Велес.

„Македонски телеком“ го задржа истиот пазарен удел во мобилната телефонија – промената во базата на корисници е во согласност со промените на пазарот. Приходите од малопродажба на говорни услуги се зголемени за 4,7 отсто, што се должи на промена на ценовните пакети и/или преминување кон поскапи пакети, како и на разликите помеѓу претплатниците и корисниците со припејд-тарифи.

Од друга страна, падот од 3,4 отсто во приходите од говорни услуги на големо ја неутрализираше добивката, поради намалениот влезен сообраќај како последица од регулативата за роаминг во Западен Балкан. Дополнителен негативен ефект има и намалувањето на приходите од продажба на опрема за 8,4 отсто.

Иако различните категории се неутрализираа меѓусебно, зголемувањето на цените доведе до раст на комбинираниот просечен приход по корисник за 3,1 отсто.

Постојаните вложувања во инфраструктурата овозможија раст во тој сегмент: бројот на приклучоци и корисници на широкопојасен интернет пораснал за нешто под 4 отсто, додека оптичкиот пристап е зголемен за 7,4 отсто, што доведе до раст на приходите од тој сегмент од 6,8 отсто.

ЕБИТДА во првата половина од годинава порасна за 2,7 отсто во споредба со истиот период лани, главно поради намалувањето на оперативните трошоци за 2 отсто. Тоа се должи на намалената продажба на уреди, што значи и намалена набавна вредност на трговските стоки – најголемата трошочна категорија, како и намалени други деловни расходи.

И покрај тоа, „Македонски телеком“ свесно жртвуваше дел од профитабилноста со зголемени вложувања во вработените – трошоците за вработени се зголемени за 5,4 отсто поради повисоките плати, бонуси и мотивациски пакети за менаџментот.

Вложувањето во инфраструктура и „паметен“ пристап кон корисниците е патот со кој компанијата го зацврстува своето место на пазарот. Благодарение на резултатите од минатата година, исплатена е дивиденда повисока за 7,7 отсто во однос на 2023 година. Со најавеното ниво на исплата, дивидендниот принос изнесува 6,3 отсто, што е повеќе од регионалната конкуренција („Телеком Словенија“ – 3,21 отсто, „Хрватски телеком“ – 3,92 отсто).

Доколку менаџментот продолжи со истата стратегија и во 2025 година и ги монетизира сите досегашни одлуки, тогаш може да се оправда и зголемувањето на категоријата плати. Меѓутоа, тоа може да се толкува и како проштална порака од стариот извршен директор, бидејќи од 1 јули „Македонски телеком“ доби нов извршен директор.

Довербата во компанијата расте и кај инвеститорите: цената на акцијата порасна за 10 отсто од почетокот на годината, а вредноста на ЕВ/ЕБИТДА (EV/EBITDA) се зголеми на 8,12 (во споредба со 6,62 на крајот од минатата година). Со тоа, „Телеком“ ја надмина индустриската конкуренција: ЕВ/ЕБИТДА кај „Хрватски телеком“ е 7, кај „Телеком Словенија“ 4,2, а кај Stoxx 600 Europe Telecom Index е 6,4.

Остануваме на прогнозата од почетокот на годината. Во 2025 година не се очекува значајна разлика на годишно ниво, а профитабилноста ќе зависи од оптимизацијата на трошоците. Се очекува низок раст на приходите, незначително зголемување на ЕБИТДА, но со потенцијал за дополнителна добивка преку монетизација на капиталните вложувања – особено во 5Г-спектарот и ИКТ-проекти со повисока маржа.