Историски рекордна цена на дизелот во САД, шест долари за галон

Цените на дизелот се искачија над 6 долари за галон (3,7 литри, н.з.) за првпат досега, зголемувајќи го ризикот од дополнителна инфлација поттикната од енергентите, непосредно пред почетокот на сезоната на најголема побарувачка за горивото.

Цените изнесуваа национален просек од 6,0556 долари за галон, според Американската автомобилска асоцијација. Во Калифорнија тие беа близу 8 долари за галон.

Како главно гориво на глобалната економија, дизелот се користи за сè, од производство на електрична енергија и греење на домовите до земјоделска опрема и товарни камиони со приколки. Иако малку Американци се директно изложени на дизелот преку нивните секојдневни набавки, тој е клучен фактор за цените на храната, трошоците за транспорт и градежништвото - што значи дека влијанието од рекордно високите цени ќе се прелее врз потрошувачите. Побарувачката исто така се зголемува со приближувањето на есента, бидејќи расте потрошувачката за греење и земјоделство.

Геополитичките превирања остро ја ограничија способноста на светот да произведува и испорачува доволни количества од горивото. Во Русија повеќемесечните украински напади со дронови врз рафинериите предизвикаа забрана за извоз на дизел. А на Блискиот Исток испораките што се одвиваат со прекини низ Ормускиот Теснец и изгубениот рафинериски капацитет ги ограничија и производството и дистрибуцијата, при што товарите со гориво сè уште се значително под нивото пред војната.

Борбите околу виталниот Ормуски Теснец и теснецот Баб ел Мандеб исто така се засилија оваа недела, а САД и Иран се чини дека се подготвуваат за продолжена војна - што би можело да ги задржи цените на енергентите повисоки подолг период.

Растот на трошоците е особено проблематичен за Републиканската партија на претседателот Доналд Трамп, со нешто повеќе од 50 дена до изборите за Конгресот на средината на мандатот. Тие би можеле да бидат од клучно значење во Мејн, каде што најголем процент домаќинства на национално ниво користат масло за греење на своите домови, како и во земјоделските држави како Охајо, Канзас и Ајова.

Но Белата куќа има малку преостанати мерки со кои би можела да влијае врз намалувањето на домашните цени, освен дополнително ослободување резерви од стратешките нафтени резерви или забрана за извоз. Американскиот министер за внатрешни работи Даг Бургам рече дека секоја идеја е на маса кога беше прашан за ограничувања на извозот на дизел, но истакна дека таквите мерки во минатото ги зголемувале цените.