Извршниот директор на JPMorgan Chase, Џејми Дајмон, смета дека зголемувањата на каматните стапки од страна на Федералните резерви (ФЕД) можеби ќе треба да продолжат понатаму од она што во моментот го очекуваме. Тој уште повеќе се залага за привремено суспендирање на покачувањата со цел да се процени целосниот ефект од минатогодишните зголемувања кои ги спроведе ФЕД.
Постои половична шанса да се остварат сегашните очекувања на Банката на федерални резерви за зголемување на референтната стапка на околу пет отсто, но и исто толкава шанса американската централна банка да ја зголеми референтната каматна стапка на шест отсто, изјави извршниот директор на JPMorgan Chase во интервју емитувано на вторникот на Fox Business.
„Лично сметам дека можеби тоа и не е доволно зголемување. Почнавме малку бавно и тоа нè стаса. Исто така не мислам дека има некаква штета само да чекаме во период од три или шест месеци“, рече Дајмон.
Главниот извршен директор на најголемата американска банка ги даде своите коментари пред објавувањето на податоците за инфлацијата во САД, кои се очекуваат в четврток и резултатите од четвртиот квартал, кои треба да бидат објавени в петок. Претставниците на ФЕД минатиот месец го забавија зголемувањето на каматните стапки, покачувајќи ги трошоците за задолжување за 50 базични поени по четири последователни зголемувања од 75 базични поени. Целната референтна стапка е меѓу 4,25 и 4,5 проценти.
Опсежното интервју се одржа во понеделникот на годишната конференција за инвестициско банкарство во здравството на JPMorgan во Сан Франциско, за првпат во живо од почетокот на пандемијата. Дајмон, кој се залагаше вработените да доаѓаат во канцелариите, рече дека околу 60 проценти од работниците во JPMorgan доаѓаат на работното место, додека останатиот дел се на различен работен распоред, со тоа што и тие половина од своето работно време го минуваат во канцеларија.
За економијата, Дајмон ги повтори коментарите што ги даваше во поголемиот дел од минатата година, велејќи дека ризиците се зголемени иако позицијата на потрошувачите е сè уште силна. Тој посочи и на влијанието на руската инвазија на Украина и квантитативното затегнување.
Додека колегите, вклучително и оние во Goldman Sachs и Morgan Stanley, отпуштаат работници, JPMorgan „сè уште е во фаза на вработување“, рече Дајмон, додавајќи дека разбира зошто компаниите се претпазливи. Тој нагласи дека притисокот врз платите малку се намалил бидејќи се намалува и нивото на одлив на работници.
.webp){kind=icon}
