.webp){kind=icon}
Глобалната економија беше посилна од очекуваното во првата половина на 2023 година, но изгледите за раст се слаби, инфлацијата покажува упорност и постојат значителни надолни ризици, се наведува во најновиот извештај за економските изгледи на ОЕЦД.
Во него се предвидува глобален раст од три проценти во 2023 година и од 2,7 проценти во 2024 година, главно поради влијанието на монетарната политика врз економијата и послабо од очекуваното закрепнување во Кина.
„Вкупната инфлација опаѓа, бидејќи цените на енергијата и на храната се намалија, но останува над целите на централните банки во многу земји. Се предвидува дека вкупната инфлација ќе продолжи постепено да се намалува во текот на 2023 година во земјите од Г20, од 7,8 проценти во 2022 година на 6 проценти во 2023 година и 4,8 проценти во 2024 година“, соопшти ОЕЦД.
Прочитај повеќе
Германија и Аргентина се единствени земји од Г20 каде БДП паѓа
ОЕЦД ги намали прогнозите и за следната година
19.09.2023
Оттаму додаваат дека базичната инфлација останува упорна, поттикната од услужниот сектор и сè уште релативно тесните пазари на трудот, што ќе бара централните банки во многу земји да ја задржат рестриктивната монетарна политика.
Годишниот раст на БДП во Соединетите Американски Држави е проектиран на 2,2 процента во 2023 година и 1,3 проценти во 2024 година, со забавување предизвикано од трендовите на пазарот на трудот и генерално од ефектите од построгата монетарна политика. Во еврозоната, каде што побарувачката е веќе придушена, се предвидува растот на БДП да се намали до 0,6 проценти во 2023 година и да се искачи до 1,1 процент во 2024 година, бидејќи негативното влијание на високата инфлација врз реалните приходи избледува. Закрепнувањето на Кина е послабо од очекуваното по повторното отворање по пандемијата, со раст проектиран на 5,1 проценти оваа година и 4,6 проценти во 2024 година.
„Нашите проекции во голема мера се во согласност со нашите претходни прогнози. Досега е избегнат натамошен значаен стрес на финансиските пазари, по турбуленциите поради неуспесите на банките во почетокот на годината. Така, глобалната економија продолжува да се соочува со предизвиците на зголемената инфлација, нискиот раст и релативно слабата трговија“, рече генералниот секретар на ОЕЦД, Матијас Корман.
Тој додаде дека приоритет на макроекономската политика е да се намали инфлацијата и повторно да се изградат фискални браници.
„Паралелно, со цел да се постават темелите за посилен и поодржлив раст на подолг рок, потребна е политичка акција за зајакнување на конкуренцијата, забрзување на инвестициите во истражување и развој со ниска содржина на јаглерод и намалување наместо зголемување на трговските бариери“, рече Корман.
Инаку, во извештајот се нагласува дека постојат низа негативни ризици. Од ОЕЦД сметаат дека инфлацијата би можела да биде уште повисока од проектираната, со оглед на тоа што сè уште се можни понатамошни нарушувања на пазарите на енергија и храна.
„Понатамошното забавување во Кина би го намалило растот на трговските партнери низ светот и би можело да ја намали деловната доверба. Јавниот долг останува покачен во многу земји, како последица на значајната фискална поддршка дадена како одговор на пандемијата на ковид-19 и при кризата со цените на енергијата“, се наведува во извештајот.
Од ОЕЦД сметаат дека монетарната политика треба да остане рестриктивна додека не се појават јасни знаци дека инфлациските притисоци трајно се намалуваат. Како што се материјализираат ефектите од минатите зголемувања, каматните стапки во многу земји најверојатно ќе треба да останат на или блиску до нивните сегашни нивоа до 2024 година.
„Итно се потребни структурни реформи за да се поттикне растот. Бидејќи економиите се соочуваат со структурни трансформации, вклучувајќи ги климата и дигиталните транзиции, потребни се реформи за да се подобрат отпорноста и иновациите. Тоа вклучува отстранување на бариерите за влез на пазарот и прекугранична трговија, промовирање на конкуренцијата и приспособување на политиките за конкуренција на дигиталната ера и подобрување на развојот на вештините“, велат од ОЕЦД.
