Фeд не е доволно убеден за намалување на каматните стапки

Претседателот на Федералните резерви (Фед), Џером Пауел, им повтори на пратениците дека американската централна банка не брза да ги намали каматните стапки додека креаторите на политиката не се убедат дека ја добиле битката со инфлацијата.

Во обраќање пред панелот на Претставничкиот дом во средата, шефот на Фед рече дека најверојатно ќе биде соодветно да се започне со намалување на трошоците за задолжување „во одреден момент годинава“, но јасно стави до знаење дека официјалните лица сè уште не се подготвени.

Забелешките ја повторија конзистентната порака од речиси секој функционер на Фед во последните недели: Економијата и пазарот на трудот се силни, што значи дека креаторите на политиката имаат време да чекаат повеќе докази дека инфлацијата се враќа на нивната цел пред да ги намалат стапките.

„Комисијата не очекува дека ќе биде соодветно да се намали целниот опсег додека не стекне поголема доверба дека инфлацијата одржливо се движи кон два отсто“, рече Пауел пред Комитетот за финансиски услуги на Претставничкиот дом, додавајќи подоцна дека официјалните лица ќе пристапат кон одлуката „внимателно и промислено“.

Шефот на Фед беше во Капитол Хил на првиот од двата дена од неговото полугодишно обраќање за монетарната политика. Тој в четврток треба да сведочи пред Комитетот за банкарство на Сенатот.

Републиканските пратеници го искористија разговорот со Пауел за да го осудат планот на Банката на федерални резерви да ги зајакне капиталните барања за големите банки и го повикаа да се откаже од сегашниот предлог - потег што Пауел рече дека нема да го исклучи. И демократите предупредија дека високите стапки ја ставаат сопственоста на куќи надвор од дофат на многу Американци и го замолија да ги намали трошоците за задолжување.

„Потребно ни е Фед да почне со намалување бидејќи, како и киријата, каматните стапки се премногу високи“, рече претставничката Ајана Пресли од Масачусетс.

Приносите на обврзниците се движеа пониско во текот на денот, како резултат на коментарите на Пауел, а акциите се искачија, додека доларот беше понизок.

Претставниците на Фед се во последните рунди од агресивната борба за зауздување на инфлацијата. Откако ја подигнаа референтната стапка на федералните фондови за повеќе од пет процентни поени, почнувајќи од март 2022 година, тие ги држат стапките стабилни од јули, поради намалувањето на ценовните притисоци.

Централните банкари сега размислуваат за тоа колку брзо и до каде треба да ги намалат стапките. Доколку избрзаат со намалувањето, официјалните лица се загрижени дека би можеле да поттикнат раст на економската активност што ќе ја одржува инфлацијата над два отсто - ниво што тие го сметаат за соодветно за здрава економија. Доколку, пак, трошоците за позајмување бидат зголемени предолго, тогаш се ризикува туркање на економијата во рецесија.

„Ако економијата еволуира нашироко како што се очекуваше, веројатно ќе биде соодветно да се започне со олабавување на политиката во одреден момент годинава“, наведе Пауел во своите подготвени забелешки, но додаде дека „тековниот напредок кон нашата цел за инфлација од два отсто не е обезбеден“. 

Запрашан кога би можел Фед да биде подготвен за намалување, Пауел рече: „Мислиме дека поради силата на економијата и силата на пазарот на трудот и напредокот што го постигнавме, можеме внимателно и промислено да пристапиме кон тој чекор“.

Во моментов нема коментари за веста. Биди прв да коментира...

Остави коментар