.webp){kind=icon}
Саудискиот милијардер принцот Алвалид бин Талал инвестирал повеќе од 500 милиони долари во руски фирми во деновите околу инвазијата на Москва на Украина.
Инвестициската фирма на принцот Алвалид, „Кингдом Холдинг“ (Kingdom Holding Co) инвестирала во „Гаспром“, „Лукоил“ и „Роснефт“ во февруари, според берзата. Русија ја нападна Украина на 24 февруари.
Не беа дадени конкретни датуми за инвестициите, а саудиската фирма не одговори на прашањата дали сè уште ги поседува акциите. Нивната вредност брзо опадна по почетокот на војната, кога трговијата во Москва беше запрена и беа воведени снакции кон Русија.
Алвалид, чиј дедо е основач на модерна Саудиска Арабија, е еден од најбогатите луѓе во земјата и најголемите меѓународни инвеститори. Неодамна, тој беше засенет од фондот на кралството, со кој претседаваше неговиот братучед, престолонаследникот Мохамед бин Салман, кој во мај купи 16,9 проценти од акциите во „Кингдом Холдинг“.
Принцот Алвалид, исто така, беше приведен во хотелот „Риц-Карлтон“ во саудиската престолнина во 2017 година, заедно со други принцови и владини претставници, како дел од, како што ја нарече државата, антикорупциска истрага. Никогаш не беа поднесени официјални обвиненија, а тој беше ослободен по 83 дена, откако постигна договор со Владата.
„Кингдом холдинг“ инвестираше 1,37 милијарди риали (365 милиони американски долари) во американските депозитари на „Гаспром“ во февруари, што е најголемиот удел од оние објавени досега оваа година. Истиот месец, исто така, инвестираше 196 милиони ријали во глобалните депозитари на „Роснефт“ и 410 милиони ријали во американските депозитари на „Лукоил“ помеѓу февруари и март.
Неговата компанија инвестираше 3,4 милијарди долари во глобални акции од 2020 година. Најголемиот удел беше инвестиција вредна 2,5 милијарди ријали во шпанската „Телефоника СА“ од април до август 2020 година.
Принцот Алвалид (67) стана еден од најпознатите саудиски инвеститори откако презема акции во компании како што се „Ситигруп“ и „Епл“. Неодамна, тој објави продажба на удел во неговиот бренд „Ротана мјузик“ (Rotana Music) на „Ворнер мјузик груп“ (Warner Music Group Corp.) и собра 2,2 милијарди долари продавајќи дел од својот удел во синџирот хотели „Фоур сизонс“ (Four Seasons) на „Каскајд Инвестментс“ (Cascade Investment LLC) на Бил Гејтс.
Алвалид е познат по долгорочните инвестиции и е обожавател на познатиот инвеститор Ворен Бафет.
