Трамп: Ако некој даде „феноменална“ понуда, ќе ги намалиме царините

Американскиот претседател Доналд Трамп изјави дека е отворен за намалување на царините доколку другите земји им понудат на САД нешто „феноменално“, сугерирајќи дека Белата куќа е сепак отворена за преговори, и покрај инсистирањето на некои високи функционери.

Во четвртокот Трамп ја бранеше својата царинска програма и покрај падот на берзата, велејќи дека е среќен што каматните стапки паѓаат и дека верува дека економските турбуленции со текот на времето ќе стивнат.

„Царините ни даваат огромна преговарачка моќ“, рече тој, додавајќи дека „имале повици од сите држави“.

Запрашан дали тоа значи дека размислува да попушти, претседателот рече дека тоа „зависи“. „Ако некој каже дека ќе ви даде нешто феноменално, сè додека ни даваат нешто добро“, рече Трамп. Сепак, тој истакна дека ќе следуваат нови давачки.

„Наскоро почнуваме со чиповите“, рече Трамп. „А фармацевтските производи се следни, мислам, на нивоа што не сме ги виделе досега. Во моментов ја разгледуваме фармацевтската индустрија. Тоа е посебна категорија. Ќе го објавиме тоа наскоро. Во моментов е во фаза на разгледување“.

Ги урна берзите

Акциите на фармацевтските компании паднаа во петокот во Индија, како и низ Азија. Фјучерс-индексите паднаа и во Европа и во САД, падна и доларот, а приносите на американските 10-годишни обврзници повторно паднаа под 4 отсто, додека царините продолжуваат да прават потреси на пазарите низ цел свет.

Претседателот зборуваше на оваа тема по еден од најлошите денови забележани на берзите од врвот на пандемијата на коронавирусот. Околу 2,5 билиони долари (2.500 милијарди долари) беа избришани од индексот S&P 500 во четвртокот, кој падна за пет проценти. Индексот Rusell 2000, кој ги следи помалите компании, го продлабочи својот пад од рекордно високото ниво во 2021 година на 20 отсто поради шпекулациите дека трговската офанзива на претседателот ќе ја забави американската економија.

Трамп повтори дека ќе биде подготвен да понуди намалување на царините особено за Кина, во случај Пекинг да одобри продажба на американскиот деловен сегмент на платформата Тикток. Рокот за продажба на апликацијата истекува в сабота доколку Трамп не наметне продолжување во обид да постигне договор.

Претседателот рече дека се „многу блиску до договор“.

Израел ги укина царините за американските стоки во текот на неделава, надевајќи се дека ќе ги избегне царините на Трамп, но Белата куќа објави дека САД му воведуваат царини од 17 отсто на Израел.

„Мислам дека нашите пазари ќе процутат. Мора да им дадете шанса“, тврди Трамп. „Треба да им дадете малку време“.

Тој се осврна на падот на цените на енергентите и 10-годишните приноси, прикажувајќи ги како позитивни знаци. „Она што ми се допаѓа е намалувањето на каматните стапки, поевтинувањето на храната“, рече претседателот. „Ми се допаѓа падот на цените на јајцата, ако го погледнете. И, многу важно, падот на цените на горивата“.

Американскиот претседател исто така рече дека верува оти Обединетото Кралство е задоволно од третманот според новиот царински режим. За таа земја беше воведена минимална царина од 10 отсто, додека за земјите од Европската Унија царина од 20 отсто.