Резиме: Зошто инфлацијата денес е повеќе од само макростатистика
Фед и очекувањата за каматните стапки
Веројатноста за намалување на каматната стапка на јулската седница на Фед изнесува 21 отсто, додека за септемвриската седница таа е над 75 отсто, покажуваат најновите податоци.
Царинскиот притисок како дополнителен катализатор
Најавените мерки на Трамп – царини од 20 до 35 отсто за повеќето трговски партнери – значат дека компаниите со ниски профитни маржи (автомобилска индустрија, малопродажба, мебел) најверојатно ќе бидат најпогодени ако инфлацијата изненади со раст, според „Ројтерс“.
Почеток на сезоната на квартални извештаи
Големите банки ќе почнат со објавување на деловните резултати веќе утре. Историски гледано, комбинацијата на засилена инфлација и солидни резултати на банките носи мешани сигнали: финансискиот сектор може да предводи, додека останатите индустрии се повлекуваат, според „Блумберг“.
Денес сите очи на јавноста ќе бидат вперени во долгоочекуваните податоци за американската инфлација, кои ќе бидат објавени во 14:30 по наше време.
Експертите веќе подолго време предупредуваат дека царините би можеле да ја зголемат инфлацијата во САД.
Што значи тоа за берзанските пазари, задолжувањето, намалувањето на клучните каматни стапки? Што може да очекуваме?
По четири последователни месеци во кои прогнозите беа повисоки од реално објавените вредности на индексот на трошоци за живот (CPI), аналитичарите сега очекуваат забрзување во јуниските податоци, кои денес ќе ги објави Американскиот завод за трудова статистика.
Се предвидува дека индексот на трошоци за живот во јуни ќе скокне на 2,6 отсто на годишно ниво и 0,3 отсто на месечно, што би значело крај на четиримесечниот период на умерен раст на цените.
Основната инфлација (без нестабилните цени на храна и енергија) се очекува да порасне на 2,9 отсто, главно поради поскапувањето на автомобилите, мебелот и играчките — категории кои најмногу се погодени од царините.
„Компаниите користат широк спектар на стратегии за да го ублажат влијанието на царините“, вели Грегори Дако од ЕЈ (EY-Parthenon) за „Блумберг“ и додава:
„Но со време нивното влијание ќе се засилува; летово очекувам уште поголем притисок.“
Заканата од повисоки царини, и последователно посилна инфлација, минатата недела ја засили Доналд Трамп, кој ја заостри реториката и најави зголемување на царините: 35 отсто на канадската стока, 30 отсто на увозот од Мексико и Европската Унија, како и општи давачки од 15 до 20 отсто за речиси сите трговски партнери. Дел од царините треба да стапат на сила во август, откако беа одложени од јули — претседателот, наводно, овојпат не планира ново одложување.
Компаниите веќе ги зголемуваат цените
До мај, според податоци од њујоршката филијала на Федералните резерви (Фед), околу три од четири компании веќе ги имаат зголемено цените за да ги покријат повисоките трошоци како последица на царините. И други анкети покажуваат дека компаниите планираат нови зголемувања; „Тојота“ (Toyota Motor) ќе ги покачи цените уште овој месец, додека трговците на мало како „Најк“ тоа ќе го сторат на есен, пренесе „Блумберг“.
Покрај стоката, економистите и креаторите на политики внимателно ќе ја следат и инфлацијата кај услугите. Некои предвидуваат дека категории што беа стабилни во последните месеци — како авионски билети и хотелски услуги — може да поскапат во јуни и да ја забрзаат вкупната инфлација.
Што значи ова за намалувањето на каматните стапки?
Податоците за инфлацијата внимателно ги следи и американската централна банка (Фед), а нејзиниот претседател Џером Пауел беше критикуван (па дури и навредуван) од претседателот Доналд Трамп бидејќи одбивал да ги намали клучните каматни стапки оваа година, поради неизвесноста што ја носат царините. Што ќе се случи сега?
Записникот од седницата на Фед во јуни открива поделени ставови меѓу функционерите во врска со влијанието на царините врз инфлацијата и монетарната политика. Пауел предупредува дека цените може повторно да пораснат.
Аналитичарите речиси и да не гледаат шанси за намалување на каматите на седницата на Фед кон крајот на месецот. Некои функционери, како гувернерите Кристофер Волер и Мишел Боман, сепак сметаат дека Фед навестил подготвеност за кратење во јули ако инфлацијата остане под контрола. Други веруваат дека таков чекор е поверојатен подоцна во годината.
И покрај најновите закани со царини, главниот економист на ПМ (Pantheon Macroeconomics), Самуел Томбс, предупредува дека Трамп и во минатото се повлекувал од воведување царини, па би можел повторно.
„Тоа не значи дека нема повторно да дојде до краткотрајно заострување, со многу високи царини,“ предупредува Томбс.
„Но компаниите и синџирите на снабдување се приспособуваат и сѐ повеќе ја вградуваат таа нестабилност во своите стратегии.“
Што да се следи денес на берзите
„Пазарите остануваат претпазливи, бидејќи објавата на CPI индексот и почетокот на сезоната на квартални извештаи ги држат цените во тесен опсег“, изјави за „Блумберг“, Били Леунг, инвестиционен стратег во „Глобал екс“ (Global X ETFs) во Сиднеј.
Берзанските индекси ширум светот се искачија на рекордни нивоа по падот во април, кога беа најавени широки царини — инвеститорите претпоставуваат дека царините нема значително да го погодат американското стопанство и профитите на компаниите.
Фјучерсите за S&P 500, Dow Jones и Nasdaq утрово малку паднаа во преттрговската сесија, што укажува на подготвеност на инвеститорите за можни нагли поместувања по 14:30 часот по средноевропско време, кога ќе биде објавен јунискиот CPI. Аналитичарите додаваат дека се можни краткорочни реакции.
|
Резиме: Зошто инфлацијата денес е повеќе од само макростатистика Фед и очекувањата за каматните стапки Веројатноста за намалување на каматната стапка на јулската седница на Фед изнесува 21 отсто, додека за септемвриската седница таа е над 75 отсто, покажуваат најновите податоци. Царинскиот притисок како дополнителен катализатор Најавените мерки на Трамп – царини од 20 до 35 отсто за повеќето трговски партнери – значат дека компаниите со ниски профитни маржи (автомобилска индустрија, малопродажба, мебел) најверојатно ќе бидат најпогодени ако инфлацијата изненади со раст, според „Ројтерс“. Почеток на сезоната на квартални извештаи Големите банки ќе почнат со објавување на деловните резултати веќе утре. Историски гледано, комбинацијата на засилена инфлација и солидни резултати на банките носи мешани сигнали: финансискиот сектор може да предводи, додека останатите индустрии се повлекуваат, според „Блумберг“. |
Што да се следи во реално време:
- Приносот на американските десетгодишни обврзници: скок над 4,3% би укажал на „јастребска“ промена на ставовите.
- Односот меѓу Russell 2000 и S&P 500: брза ротација кон компании со помала пазарна капитализација значи дека пазарот инфлацијата ја гледа како привремена.
- Дефанзивни сектори (комунални услуги, основна потрошувачка): ако растат заедно со приносите, пазарот оценува дека Фед можеби нема да реагира доволно брзо.
.webp){kind=icon}
Во моментов нема коментари за веста. Биди прв да коментира...