Кина со нов план за спас на пазарот на недвижности

Кина се подготвува да мобилизира компании во сопственост на централната влада во Пекинг за да купуваат непродадени станови од градежни компании во финансиски тешкотии, откако претходната иницијатива заснована на локалните власти имаше ограничен успех, посочуваат извори упатени во плановите.

Според нив, регулаторите планираат да побараат од некои од најголемите државни претпријатија и компании за управување со проблематични долгови, меѓу кои и „Чајна Синда“ (China Cinda Asset Management Co.), да помогнат во расчистувањето на вишокот станови. Една од нив навела дека фирмите ќе можат да користат 300 милијарди јуани (41,8 милијарда американски долари) средства што централната банка ги издвоила за програмата минатата година.

Новата иницијатива, која сè уште е во фаза на разгледување, би можела да помогне да се забрза расчистувањето на вишокот од 408 милиони квадратни метри станбен простор во Кина – повеќе од површината на Детроит – и да се намали финансискиот товар на проблематичните градежни компании. Официјалните лица исто така разгледуваат укинување на ценовниот плафон за програмата, со цел да се забрза процесот и да се подобри економската исплатливост на планот и за градежните компании и за државните купувачи, рекоа во март лица упатени во прашањето.

Министерството за домување и „Синда“ не одговорија веднаш на барањата за коментар.

Иако вклучувањето компании за управување со проблематични долгови би можело да помогне за подобрување на расположението, ефектот може да биде ограничен поради нивната затегната финансиска состојба. Планот доаѓа во момент кога кинескиот сектор за недвижности достигнува ново дно со повлекувањето од берзанско котирање на „Чајна евергранд груп“ (China Evergrande Group) и падот на продажбата на нови станови од 100-те најголеми градежни компании за повеќе од 20 отсто во два последователни месеца.

Народната банка на Кина во мај 2024 година започна национална програма за рефинансирање за да им помогне на локалните државни компании да купуваат непродадени станови, а неколку месеци подоцна најави дека ќе ја прошири иницијативата. Во земјата има околу 60 милиони непродадени стана, за чија продажба, без државна помош, би биле потребни повеќе од четири години, процени „Блумберг економикс“ (Bloomberg Economics) во мај минатата година.

Сепак, напредокот е бавен – досега е одобрено помалку од 6 отсто од најавените заеми, се наведува во извештај на „Блумберг интелиџенс“ (Bloomberg Intelligence) од почетокот на месецов. Според извештајот, забрзувањето на програмата е малку веројатно поради несовпаѓањето меѓу локациите на непродадените станови и побарувачката за достапни станови.

Кога кинескиот сектор за недвижности почна да запаѓa во криза пред повеќе од четири години, Пекинг побара помош од компании за управување со проблематични долгови. Регулаторите им порачаа на фирмите, меѓу кои и „Хуаронг“ (Huarong Asset Management Co.) и „Синда“, да учествуваат во реструктурирањето на послабите градежни компании, да преземаат замрзнати градежни проекти и да откупуваат побарувања од кредити во доцнење со отплата.

Потоа, на почетокот на 2023 година, Народната банка на Кина насочи заеми од 80 милијарди јуани преку овие компании за управување со проблематични долгови кон одбрани градежни компании, со годишна каматна стапка од 1,75 отсто, додека ги охрабруваше да го удвојат износот со средства од сопствените резерви.

Сепак, малку проекти навистина беа реализирани во рамките на оваа политика, а ефектот беше слаб. Четирите најголеми компании за управување со проблематични долгови се соочуваа со побарувања од кредити во доцнење со отплата, откако претходно се префрлија на прекумерно кредитирање за време на бумот на пазарот на недвижности во Кина.

Напорите на Кина да му стави крај на повеќегодишниот пад на пазарот на недвижности досега не дадоа значајни резултати, бидејќи домашната побарувачка и пазарот на трудот остануваат слаби.

Регулаторите сè уште немаат понудено подрастични мерки за стимул. Кинескиот претседател Шји Џјинпинг минатиот месец, на централната конференција за урбан развој, повика на забрзување на „новиот модел“ за развој на недвижности, промовирајќи порамномерен пристап кон урбаното планирање и обновата, но без да ги исполни очекувањата на дел од инвеститорите за поагресивни мерки.

Продажбата на станови во земјата го продолжи падот и во јули, бидејќи намалувањето на цените не успеа да привлече купувачи. Аналитичарите, вклучувајќи ги и оние од УБС (UBS Group AG), ги одложија прогнозите за закрепнување на кинескиот пазар на недвижности за периодот од средината до крајот на 2026 година.

 

Во моментов нема коментари за веста. Биди прв да коментира...

Остави коментар