text size
Делумното затворање на големата депонија за отпад на индонезискиот туристички остров Бали принудува илјадници жители да го палат отпадот во сопствените дворови, што отвора сериозни прашања за животната средина и здравјето на луѓето.
Депонијата Сувунг, која се наоѓа околу 10 километри североисточно од меѓународниот аеродром во Денпасар, досега дневно примаше околу илјада тони отпад. Властите објавија дека од 1 април повеќе нема да прима органски отпад бидејќи депонијата се приближува до својот максимален капацитет. Со тоа тие сакаат органскиот отпад да го пренасочат кон локации на кои може да се компостира или да се третира на посоодветен начин.
Органскиот отпад, како што се остатоци од домаќинства, расипана храна и остатоци од храна од стотици хотели и клубови на островот, со години претставува еден од најголемите проблеми на Сувунг. Кога ваков отпад завршува на депонија, тој создава метан, стакленички гас што придонесува за глобалното затоплување. Органскиот отпад сочинува околу две третини од вкупниот отпад што се создава на Бали.
Но бидејќи речиси нема други решенија, луѓето почнаа да го палат отпадот или уште почесто да го фрлаат во реки и покрај патишта.
„Речиси секоја трета или четврта куќа во мојата улица го пали својот отпад“, вели Равинџај Кукреја, долгогодишен жител на Денпасар. „На прв поглед тоа се мали количества, но кога сè ќе се собере, тоа станува сериозен проблем.“ Тој додаде и дека квартовските собиралишта за отпад сега се преполни.
Отпадот завршува и на плажите, особено за време на монсуните
Bloomberg
Проблемот е нешто помалку изразен во туристичките делови на островот, каде што одредени компании имаат сопствени системи за управување со отпад. Сепак, тешкотиите со Сувунг дополнително ја продлабочуваат сè поголемата криза со отпадот на Бали. Поради слабите капацитети за собирање и обработка на отпад, островот одамна се бори со сериозно загадување со пластика во реките и крајбрежните води. За време на сезонските монсуни проблемот станува уште повидлив бидејќи поројните дождови го носат отпадот на плажите.
Индонезискиот државен инвестициски фонд „Данантара“ најави изградба на постројки што ќе го согоруваат отпадот и истовремено ќе произведуваат електрична енергија во Денпасар, како и во десетици други градови низ архипелагот. На Бали фондот соработува со кинеската компанија ЖВЕП (Zhejiang Weiming Environmental Protection) на развој на постројка што треба да започне со работа до крајот на 2027 година.
Гувернерот на Бали, Вејан Костер, го опиша проектот на „Данантара“ за претворање на отпадот во енергија како „светилник на надежта“. Но тој предупреди дека додека таквите постројки не започнат со работа, Бали е „под опсада на ѓубре, што е иронија за глобална туристичка дестинација што во светот ја претставува сликата на Индонезија“.
Локалните власти во меѓувреме ги повикуваат домаќинствата сами да го селектираат отпадот и да го компостираат органскиот дел за барем делумно да се ублажи проблемот додека не почнат да работат согорувачките центри. Сепак, Костер признава дека таквите мерки не се лесни за спроведување во практика.
.webp){kind=icon}
