Летото штотуку започна, а прогнозите укажуваат на уште една сезона обележана со натпросечно високи температури низ Европа. Затоа сè повеќе туристи наместо традиционалните сончеви дестинации избираат посвежи краишта, а нова анализа покажа кои европски земји се најдобар избор за таканаречен „кулкејшн“ одмор.
Апликацијата за патувања „Поларстепс“ (Polarsteps) го објави првиот Summer Heat Escape Index, рангирање што споредува 25 европски држави според условите за летен одмор без екстремно високи температури.
Предвид не биле земени само дневните температури на воздухот, туку и низа други фактори што влијаат врз чувството на удобност во текот на летото.
Анализата ги опфатила просечните дневни и ноќни температури во август, температурата на морето, уделот на шумските површини, густината на население и можностите за кампување во природа.
Истражувањето доаѓа по анкетата што „Поларстепс“ ја спроведе во април годинава меѓу британските патници. Резултатите покажале дека 35 отсто од испитаниците за годинешниот летен одмор избрале посвежа дестинација, а повеќе од една петтина од нив го направиле тоа за првпат.
Северот на Европа доминира на врвот на скалата
Првото место го зазеде Исланд, кој оствари вкупен резултат од 83,81 поен. Во текот на август просечната дневна температура таму изнесува само 10,7 степени Целзиусови, додека ноќните температури се спуштаат на околу осум степени. Земјата има многу мала густина на население, можности за кампување во природа и едни од најстудените морски води за капење во Европа.
На второто место се најде Финска, која се издвојува по своите огромни шумски површини. Речиси три четвртини од нејзината територија се покриени со шуми, а просечната температура во август се движи околу пријатни 17 степени Целзиусови.
Речиси три четвртини од Финска се покриени со шуми, а летните температури ретко надминуваат пријатни 17 степени/Depositphotos
Третото место ѝ припадна на Норвешка. Покрај умерените летни температури, земјата нуди и некои од најстудените морски подрачја за капење во Европа. Во областа Њу-Олесунд температурата на морето во август во просек изнесува само 5,3 степени Целзиусови.
Меѓу десетте најдобро рангирани земји се најде и Шведска, која привлекува со попријатни летни температури, бројни шуми и богати природни убавини.
Балтичките земји стануваат сè попривлечни за туристите
Посебно внимание привлекоа Естонија, Летонија и Литванија, кои исто така се најдоа меѓу десетте најдобро рангирани земји. Со тоа балтичкиот регион сè повеќе се наметнува како алтернатива за патниците што сакаат да ги избегнат екстремните летни горештини, но не сакаат да патуваат толку далеку на север како до Скандинавија или Исланд.
Естонија се најде меѓу десетте најдобри, потврдувајќи ја растечката популарност на Балтикот меѓу туристите/Depositphotos
Иако најголемо внимание привлекуваат посвежите дестинации, авторите на истражувањето посочуваат дека и делови од атлантскиот брег нудат интересен компромис. Благодарение на влијанието на Атлантскиот Океан, одредени области во Франција, Шпанија и Португалија дури и во екот на летото имаат значително постудено море отколку што многумина би очекувале, па претставуваат привлечен избор за оние што сакаат да уживаат во топло време, но и лесно да се разладат.
Најдобрите европски дестинации за бегство од летните горештини
.webp){kind=icon}
