Големите отпуштања ги „издишаа“ Маск и Закерберг

Реструктурирањето е ужасно време за вработените во која било компанија, но исто така е можност да се концентрираат на она што сигурно носи пари. Илон Маск направи толку длабоки резови во „Твитер“ (Twitter Inc), што сега неговиот тим бара од десетици работници да се вратат на своите позиции откако беа отпуштени минатиот петок, кога на околу половина од работната сила на компанијата ѝ беше покажана вратата. Во меѓувреме, „Мета“ (Meta Platforms Inc.) на Марк Закерберг објави дека отпушта илјадници свои вработени, од вкупно 87.000, што ќе биде прво масовно отпуштање во историјата на компанијата.

Инфлацијата, стравот од рецесија и пандемискиот бум во вработувањата доведоа до оваа пресвртна точка за високотехнолошката индустрија, при што и други фирми, како на пример „Страјп“ (Stripe Inc.), исто така направија болни отпуштања. Но кратењата во „Мета“ и „Твитер“ се голема можност да се зајакне нивниот резултат; време е да се остави настрана опсесијата на нивните лидери со нови и непроверени услуги.

Bloomberg

И Маск и Закерберг водат компании во кои рекламирањето е во срцевината на бизнисот и тие треба да се фокусираат на тоа да бидат добри огласувачи ако сакаат да го запрат падот - дури и кога се чини дека моментот на доминација го достигнал врвот. Наместо тоа, основачот на „Фејсбук“ (Facebook )се залета по виртуелна реалност, а Маск им се заканува на огласувачите што го бојкотираат „Твитер“, откако компании како „Џенерал моторс“ (General Motors Co.), „Мајкрософт“ (Microsoft Corp.) и „Верајзон“ (Verizon Communications Inc.) го суспендираа своето рекламирање на платформата поради загриженост за несоодветно модерирање на содржината.

Закерберг инвестира повеќе од десет милијарди долари во изградба на нов бизнис заснован на виртуелна реалност - наречен метаверзум - кој вклучува „хедсет“ од 1.500 долари, што тој, необјасниво, го нуди за канцелариски состаноци. Маск ги продава сините значки за верификација на налозите на „Твитер“ за осум долари и ќе му ги одзема на секој што нема да плати. И двајцата милијардери упорно ги следат идеите што имаат мали шанси да заработат пари во време кога и двете компании треба да ги платат своите сметки. „Твитер“ е особено оптоварен со годишна камата од милијарда долари, благодарение на долгот што го презеде по купувањето на компанијата од страна на Маск.

Плановите на Маск да ја генерира потребната готовина немаат смисла. Дури и ако сите 400.000 верификувани корисници со сина значка ја платат месечната претплата, тоа сепак ќе донесе само 38 милиони долари годишно. Маск, исто така, сака да натера повеќе корисници да ја купат значката, но за нејзината вредност не може многу да се напише: можете да објавувате подолги видеа, да котирате повисоко во темите на платформата и да гледате половина од нормалниот обем на реклами.

Bloomberg

Пред Маск, обидите на „Твитер“ да заработи преку услуга со претплата, позната како „Твитер блу“ (Twitter Blue), секогаш беа мали и експериментални. Тоа е затоа што рекламирањето на „Твитер“ отсекогаш било стабилно (и многу повеќе од 38 милиони долари). Компанијата оствари приход од 1,2 милијарда долари во вториот квартал годинава, при што приближно 90 отсто од износот доаѓа од рекламирање. „Мета“ генерира 28,9 милијарди долари од продажба во вториот квартал, а речиси сите тие пари доаѓаат од рекламирање.

Секако, обидите за диверзификација имаат смисла, како што тврдев и претходно. Бизнисот со дигитално рекламирање, кој порасна за 21 отсто во 2021 година, најверојатно ќе забави до едноцифрен број во наредните години.

Но Закерберг и Маск менуваат премногу брзо и премногу радикално. Тие се обложуваат на тоа нивните компании да продаваат производи, а компаниите за социјални мрежи генерално се ужасни во тоа поле. „Снеп“ (Snap Inc.), на пример, никогаш не ги претвори своите очила за проширена реалност во одржлив прилив на приходи. Самиот „Фејсбук“ зад себе има голем број неуспешни производи. Само во изминатата година затвори неколку пропаднати бизниси.

Технолошката индустрија влегува во ера на штедење, бидејќи неколку големи компании ги замрзнаа вработувањата и ја намалуваат својата работна сила. Важат и тврдењата дека компаниите како „Твитер“ треба да се модернизираат во секој случај и дека преминот од светкавите новитети како што се самоуправувачките автомобили и криптовалутите кон изградбата на навистина корисни производи е здрав чекор во еволуцијата на технолошката индустрија. На крајот од краиштата, пропаста на dotcom од пред две децении создаде брутален пазарен лонец, од кој истекоа компании како „Амазон“ (Amazon.com Inc.) и „Ибеј“ (eBay Inc.), кои на крајот процветаа.

Но за да останат во живот „Твитер“ и „Фејсбук“ во оваа и следната голема бура, нивните лидери мора да се дистанцираат од новите идеи и од секој порив да го зацврстат својот кредибилитет како иноватори. Тие треба да се држат до она што засега функционира. Преголема ароганција може да доведе до пропаѓање.

Во моментов нема коментари за веста. Биди прв да коментира...

Остави коментар