ББА-коментар: „Кока-Кола“ се соочува со предизвици

Компанијата „Кока-Кола“ не може да биде задоволна со резултатите од третиот квартал од 2024 година бидејќи потфрли во перформансите во однос на истиот квартал минатата година. Обемот на глобалната продажба се намали за еден процент, а нето-оперативниот приход од 11,854 милиони долари е намален за 0,8 проценти, што не е толку алармантно како намалувањето на вредноста на ЕБИТ од 23,2 проценти за истиот период. Поточно, ЕБИТ маржата е на ниво од 21,2 проценти, што е за 6,2 процентни поени помалку од истиот период лани. Ако загребеме под вредноста на разредениот ЕБИТ, „Кока-Кола“ е оптоварена со ставки што влијаат на споредливоста годинава бидејќи тие вклучуваат трошок од 919 милиони американски долари поврзан со преоценувањето на објективната вредност на стекнувањето на „Ферлајф“ (Fairlife, LLC) од 2020 година.

Меѓутоа, првата половина од годината е заслужна за повисоки приходи од продажба, па на крајот на третиот квартал од 2024 година тие изнесуваат 35,517 милиони долари, што е за 1,6 проценти повеќе од првите девет месеци од минатата година. Глобалните шокови, кои влијаат на цената на продадените стоки, „Кока-Кола“ успешно ги пренесува на клиентите и на тој начин успева да одржи релативно стабилна бруто-маржа. Таа се движи од 60 до 61 отсто годишно.

Силна маркетиншка кампања

Компанијата е синоним во сегментот на газирани пијалаци и ги користи сите свои ресурси за да го поттикне растот на брендовите во различни категории со цел нивниот придонес да биде повидлив во генерирањето приходи од продажба и, последователно, профит. Затоа, компанијата може да се пофали дека го зголемила пазарниот удел во вкупните безалкохолни пијалаци приготвени за пиење. Зад ова стои силната маркетиншка кампања спроведена за време на церемонијата на отворање и затворање на Олимписките игри во Париз, каде што „Кока- Кола“ ги промовираше златните шишиња „смартвотер“ (Smartwater) и со тоа ја зголеми продажбата и во количеството и во вредносната компонента на спортските пијалаци, т.е. негазираните пијалаци.

Обемот на продажба на газирани безалкохолни пијалаци остана на исто ниво. Тоа е резултат на дејството на фактори од различни пазари, чии ефекти меѓусебно се неутрализираа. Растот во Јужна Америка, Северна Америка и Азија не придонесе за компанијата поради падот на обемот на продажба во Европа, Блискиот Исток и Африка. Така, падот на продажбата во Европа, Блискиот Исток и Африка е последица на преференциите на потрошувачите кон категориите вода, спортски пијалаци, кафе и чај во однос на газираните безалкохолни пијалаци, додека состојбата на другите пазари е обратна. Додека европско-африканскиот блок го неутрализираше растот на продажбата на газирани пијалаци, другите пазари го неутрализираа растот на продажбата на вода, спортски пијалаци, чај и кафе на тој пазар. Приходите од цена/микс се зголемија за околу 10 проценти, најмногу поради порастот на цените на пазарите со интензивна инфлација. Најголема годишна промена од 21 процент во оваа категорија има на јужноамериканскиот пазар, а тоа главно се должи на инфлацискиот пораст на цените во Аргентина.

Географски, северноамериканскиот пазар е најдоминантен во генерирањето приходи, со придонес од 42 проценти во третиот квартал годинава, додека во истиот период лани компанијата добила 37 проценти од приходите од тој пазар. Споредувајќи ги тие два квартала на годишно ниво, северноамериканскиот пазар порасна за 12 проценти, додека јужноамериканскиот пазар, трет најдоминантен, порасна за четири проценти годишно на ниво на третиот квартал. И тие се единствените пазари што остварија позитивни стапки на раст во тој период. Најголемиот пад на приходите на „Кока-Кола“ доаѓа од инвестициите во погоните за полнење, каде што приходите се за 20 проценти помали поради влијанието на продажбата на франшизата во трите квартали од 2024 година во споредба со истиот период минатата година.

Очекувања

Приходите во четвртиот квартал ќе бидат најболната точка за „Кока-Кола“, бидејќи во текот на целата година не се на нивото на кое предвидуваше врвот на компанијата. „Кока-Кола“ се соочува со императив да ги зголеми цените на своите производи на сите пазари, особено на оние што се погодени од силна инфлација. Истовремено, тоа  влијае негативно и на количествената компонента бидејќи количеството на приходот не го следи растечкиот тренд на ценовната компонента. Очекуваме дека компанијата ќе работи на иновации на производи на пазарите во Европа, Блискиот Исток и Африка бидејќи свеста за поздрав начин на живот е сеприсутна кај потрошувачите. Готовинскиот тек од работењето се намалуваше од година на година и дополнително беше оптоварен со исплата од шест милијарди долари од тековните даночни спорови во САД. Затоа, пред „Кока-Кола“ е предизвикот како да се справи со намалувањето на обемот на продажбата поради зголемувањето на цените на производите бидејќи директните конкуренти веќе почнаа да ги намалуваат своите цени. Конкретно, очекуваме дека ќе бидат засегнати сегментите на негазирани и спортски пијалаци, вода, кафе и чај, бидејќи компанијата се соочува со висококонкурентен пазар таму.

Во моментов нема коментари за веста. Биди прв да коментира...

Остави коментар