Со какви предизвици се соочува „Хајнекен“?

Стратегијата „ЕверГрин“ на „Хајнекен“ (Heineken) продолжува да ги исполнува планираните цели и покрај предизвиците во трендовите на потрошувачите и индустријата. Од почетокот на годината „Хајнекен“ оствари 26,9 милијарди евра приход од органски раст, од кои 33,8 отсто во третиот квартал, со што ги надмина приходите од продажба од истиот период лани за 5,1 отсто.

Приходите од продажба се предводени од растот на цените од 3 отсто во третиот квартал годинава во однос на третиот квартал од минатата година (од почетокот на годината ценовната компонента имаше годишен раст од 4,3 отсто). Тоа е резултат на зголемувањето на цените за ублажување на инфлаторните притисоци и премиумизацијата на портфолиото, пред сѐ на брендот „хајнекен“. Логичен редослед е дека и нето-приходот по хектолитар се зголемил за 3,7 отсто на годишно ниво. Сепак, врз нето-приходот остварен преку органскиот раст влијаеја пресметките на валутите, што имаше ефект да го намали за повеќе од милијарда евра од почетокот на годината. Причината за тоа лежи во девалвацијата на нигериската наира, мексиканскиот пезос, бразилскиот реал и етиопскиот бир.

Столбовите на органскиот раст се премиум сегментот, брендот „хајнекен“ и безалкохолното пиво. Обемот на премиум порасна за 4,5 проценти првенствено во Бразил, Јужна Африка и Индија, при што „Хајнекен“ постигна раст од 8,7 проценти со дополнителни значителни придонеси од „кингфишер ултра“ (Kingfisher Ultra) во Индија и „савана“ во Јужна Африка. Сепак, рекордери во растот се безалкохолното пиво и сајдерот (cider), чија продажба е зголемена за 11 отсто, што дава дополнителна потврда за лидерската позиција во тој сегмент. Синонимот за безалкохолно пиво 0,0 на „Хајнекен“ порасна за 3,4 отсто во третиот квартал во споредба со истиот период минатата година, со раст предводен од Бразил, САД и Виетнам. Според тоа, обемниот раст на продажбата на пиво од 1,6 отсто од почетокот на годината во однос на истиот период лани е нето-ефектот од растот во Европа, Африка и Блискиот Исток и намалувањето на продажбата во Америка и Азија.

Африканскиот пазар е единствениот што постигна позитивни стапки и во генерирањето органски раст на нето-приходот и на обемот на продажба. Третиот квартал од овој пазар му донесе на „Хајнекен“ рекорден органски раст од 23,1 отсто и нето-приход по хектолитар од 16,7 отсто. Зад овој раст се крие приспособувањето на ценовната компонента во поголема мера од количеството, поради влијанието на инфлацијата врз цените, со цел да се компензира влијанието на девалвацијата на валутата во одредени африкански земји.

Американскиот пазар беше погоден од 1,3 отсто намалување на обемот на продажба во овој квартал во споредба со истиот квартал минатата година. Позитивното приспособување на компанијата и премиумизацијата на портфолиото придонесоа овој пазар да има органски раст на нето-приходот од 1,8 отсто, односно зголемување на нето-приходот по хектолитар за 2,7 отсто.

Севкупно, Европејците пијат повеќе производи на „Хајнекен“ по поевтини цени во третиот квартал од годинава во споредба со истиот период минатата година - што го намали органскиот нето-приход на компанијата за 1,1 отсто. Пониските цени влијаеја нето-приходот по хектолитар да се намали за 1,5 отсто. Зад сцената, цените значително се зголемија минатата година, а основните цени во овој квартал останаа стабилни во однос на првата половина од 2024 година. Обемот на продажба на пиво порасна органски за 1,4 отсто, со посилни резултати во непотрошувачкиот канал. Премиум сегментот предводен од „бира морети“, „десперадос“ и „хајнекен“ забележа умерен едноцифрен раст. Во Обединетото Кралство и во Шпанија имаше мал пад на органските нето-приходи, но обемот на продажба на пиво се зголеми. Франција и Италија забележаа пад на органските нето-приходи, додека премиум брендовите продолжија да растат. На Запад, Германија и Ирска забележаа раст, додека Источна Европа и Балканот исто така забележаа раст на обемот, предводени од Полска, Чешка, Грција и Словенија. Дополнително, Словенија забележа двоцифрен раст во премиум сегментот.

Очекувањата на „Хајнекен“ се дека растот на нето-добивката ќе биде меѓу 4 и 8 проценти на крајот на 2024 година во споредба со истиот период минатата година. Сепак, се смета дека толку голем опсег е последица на предизвиците со кои се соочува компанијата: нестабилноста на валутите во Мексико и Бразил и во две африкански земји од една страна, додека од друга страна постои предизвикот колку долго ќе може на пазарите што имаат квантитативен пад да генерира приход преку поскапувања. „Хајнекен“ се сврте кон премиумизацијата, преку која сака да ја зајакне ценовната компонента на приходот. Но, ако го погледнеме фактот дека 35 отсто од вкупниот продаден волумен доаѓа од американскиот пазар, ние сме на мислење дека постои страв дека Бразил нема да може долго време да го надомести падот на обемот на продажбата во Мексико и во САД, каде што се бележат надолни трендови. Дополнително на фактот дека Мексико се соочува со забавување на економската активност и девалвација на пезосот, американскиот пазар ќе биде арена за зголемени маркетинг-инвестиции и претпазливи ценовни политики. Додуша, пазарите во Америка и Европа се карактеризираат со пониски трошоци за суровини и енергија во споредба со пазарите во Африка и Блискиот Исток, кои се соочени со инфлација на трошоците.

Во моментов нема коментари за веста. Биди прв да коментира...

Остави коментар