„Фрст солар“ (First Solar), американски производител на соларни панели, кој нуди и услуги поврзани со фотоволтаични електроцентрали, во четвртиот квартал од 2024 година оствари за 32 отсто поголеми приходи од продажба во споредба со истиот период претходната година. ЕБИТДА се зголеми за 20 проценти, меѓутоа растот на трошоците за продажба од 45 проценти предизвика маргината на ЕБИТДА да биде пониска за 3,6 процентни поени.
Зголемената побарувачка и американските царини за панелите произведени надвор од земјата позитивно влијаеја на растот на продажбата на модулите од 30 отсто во текот на четвртиот квартал. Негативно влијание врз профитната маржа имаше зголемувањето на бројот на вработени за 21 отсто во однос на 2023 година, како и одложувањето на испораките на 250 мегавати модули што беа планирани за тој период.
И покрај зголемените инвестиции за зголемување на капацитетите на американскиот пазар, капиталните расходи во четвртиот квартал од 2024 година беа за девет отсто пониски од истиот период претходната година. Во Охајо компанијата се соочи со непредвидени трошоци поради недоволното искористување на капацитетот, загуби на принос и други трошоци поврзани со конверзија на технологијата на производствената линија.
Вкупниот долг во споредба со 2023 година се зголеми за 23 отсто, додека готовината е за 11 проценти помала во однос на 2023 година. Сепак, компанијата продолжува да бележи силна ликвидност, со парични резерви поголеми од вкупниот долг. Во декември 2024 година „Фрст солар“ стапи во трансакција со „Виза“ (Visa) за продажба на даночни кредити од „Секција 45X“ во вредност од приближно 800 милиони евра, од кои готовинскиот прилив во четвртиот квартал изнесуваше приближно 577 милиони евра.
Цените на акциите на „Фрст солар“ се речиси преполовени по големиот скок на вредноста што го постигнаа во мај 2024 година. Надолниот тренд продолжи и по објавувањето на резултатите, а акциите моментално се на ценовно ниво од 146 евра.
За првиот квартал годинава компанијата проектира продажба од 3 гигавати модули со стабилна бруто-маржа од околу 47 проценти. На приходите позитивно ќе влијае и преостанатиот приход од продажбата на даночните кредити од „Секција 45X“, како и продажбата на одложени испораки. Клучниот фактор на несигурност што ќе влијае на бизнисот ќе бидат трговската политика на новата американска администрација и нејзиното потенцијално ограничување на поддршката за обновливи извори на енергија. Потенцијалното воведување царини за увоз на суровини, на пример 25 отсто за увоз на алуминиум како што очекува компанијата, ќе има негативно влијание врз оперативните трошоци. Во исто време мерките за ограничување на увозот на американскиот пазар ќе ѝ дадат предност на компанијата во однос на странските конкуренти. Планираното започнување на производството во Луизијана потенцијално може да доведе до дополнителни непланирани капитални расходи, слични на оние што се забележани во Охајо и во Алабама.
.webp){kind=icon}
