Како цените на бакарот и на челикот ќе се одразат на цените на опремата за ветерници?

Додека цените на суровините како што е бакарот растат, падот на цените на челикот и способноста на производителите на опрема за ветерни турбини (ОЕМ) да ги зголемат цените по инсталиран мегават помогнаа да се подобрат нивните маржи. Сепак, производителите од ЕУ остануваат помалку изложени на нестабилноста на влезните трошоци во споредба со американските конкуренти, првенствено поради увозните царини за челик и за алуминиум и неизвесноста за идните регулаторни промени.

Челикот сочинува повеќе од две третини од масата на ветерните турбини и претставува единствена најзначајна суровина што влијае на трошоците. Цените на ХРЦ (топловалан челик) се намалени за околу 60 отсто од рекордните, највисоки нивоа во 2022 година поради стабилизирањето на синџирите на снабдување и стабилизирањето на побарувачката. Производителите на турбини првично го користеа поскапувањето на суровините за да ги оправдаат повисоките цени по инсталиран мегават, а падот на цените помогна да се подобрат оперативните резултати.

Цените на бакарот, кој е втора најважна суровина според влијанието во трошоците, продолжуваат да растат поради зголемената побарувачка во процесот на електрификација. Во зависност од тоа дали ветерните централи се на копно или на море, турбините може да вклучуваат до 10 тони бакар на мегават. Оваа суровина има значајно влијание врз вкупните трошоци за материјали, што може да се види по тоа што тековното зголемување на цената има негативно влијание врз бруто-маржите на производителите.

Покрај челикот и бакарот, главните суровини во производството на турбини на ветер вклучуваат леано железо, алуминиум и ретки метали (неодимиум и диспрозиум). Некои од цените на овие суровини забележаа благ пораст, но имаат помало влијание на маржите.

Набавката и преработката на овие суровини често зависат од еден регион, што претставува дополнителен ризик, особено во ситуација на влошување на глобалните геополитички односи.

Производителите од САД се соочуваат со поголем товар на маржите поради царините за увоз на суровини, особено челик и алуминиум. Овие компании се исто така изложени на несигурности во врска со натамошниот пристап на новата администрација кон регулаторните субвенции и даночните стимулации за обновливите извори на енергија. Европските производители имаат постабилна регулаторна средина, која им помага поефикасно да ги планираат трошоците и производството. Меѓутоа, бидејќи ЕУ сè повеќе инвестира во одбранбениот сектор, во иднина тоа потенцијално може да доведе до намалување на расходите во зелената транзиција.

Кинеските производители имаат значителна предност во тоа што производството им е значително поевтино благодарение на пониските трошоци за работна сила, субвенциите и локално достапните суровини. Тоа им овозможува да користат поагресивни стратегии за цени, што врши дополнителен притисок врз другите производители.

Во наредниот период очекуваме дека производителите на ветерни турбини ќе продолжат да бележат пораст на приходите во комбинација со стабилни маржи, со оглед на ориентацијата кон зајакнување на обновливите извори на енергија. Сепак, се очекува раст на цените на челикот и другите суровини, што ќе изврши притисок врз производствените трошоци и бруто-маржите, особено за производителите што немаат долгорочни договори за набавка на суровини. Одржливоста на маржите ќе зависи од способноста на производителите да продолжат да ги пренесуваат трошоците на клиентите.

Во моментов нема коментари за веста. Биди прв да коментира...

Остави коментар