Според извештајот објавен од францускиот луксузен конгломерат, LVMH (Moët Hennessy Louis Vuitton), сопственик на „Луј Витон“ (Louis Vuitton) и „Кристијан Диор“ (Christian Dior), луксузните стоки, како единствен сегмент од економијата, ќе останат имуни на економската криза, додека трговците на мало немаат таква среќа.
Наглиот раст на инфлацијата, промените на пазарот и мрачната економска клима не се покажаа како пречка за оние со длабоки џебови. Имено, извештајот на LVMH за продажба укажува на скок од 22 отсто. Побарувачката за чанти, часовници, накит, кожени производи и автомобили е зголемена кај богатата клиентела.
„Олеснувањето од фактот дека излеговме живи од пандемијата ги надмина сите лоши вести и нè прикажа во светло на потрошувачи кои можат да прифатат 'carpe diem' (зграпчи го денот) став“, вели аналитичарот на Bernstein, Лука Солка. „Никој не сака да биде најбогатиот човек на гробишта“, појаснува тој.
Bloomberg Mercury
Ваквиот став доведе до создавање на редици пред бутиците на Christian Dior и Chanel во Париз, Берлин и Лондон. Сцените потсетуваат на ерата пред пандемијата кога кинеските туристи ги искористија пониските цени на луксузните брендови во Европа. Но, сега ситуацијата е поинаква и кинеските купувачи главно сè уште отсуствуваат од Европа поради политиката за „нулта ковид“ во нивната земја. Американците водени од силниот долар и Европејците се тие што купуваат.
Растечкиот апетит кај богатите за луксузни стоки не се задоволува само со чанти и скапи ситници, па така и продажбата на автомобили Mercedes-Benz се зголеми за повеќе од една петтина минатиот квартал. Првичната јавна понуда на Porsche имаше голема корист од препознатливоста на брендот. По излегувањето на берзата, пазарната вредност на Porsche го надмина Volkswagen, како чадор компанија, додека продажбата на другите автомобили е во опаѓање.
Жан-Жак Гиони, главен финансиски директор на LVMH, им посочи на аналитичарите дека во минатите кризи, купувачите на луксузни стоки повеќе реагирале на берзанските шокови отколку на забавувањето на економскиот раст. Тој додаде дека за разлика од распространетите продавници за малопродажба, LVMH има способност да ги пренесе зголемувањата на трошоците на своите богати клиенти.
Bloomberg Mercury
Во меѓувреме, потрошувачкото лудило продолжува. Sotheby's (најголемиот дилер на ликовна и декоративна уметност, накит и колекционерски предмети) кон крајот од минатиот месец на аукција во Париз, ја продаде својата најскапа чанта Hermes Kelly, изработена од крокодилска кожа, за 352.800 евра. Таа продажба не го собори рекордот на сите времиња што го држи Christie's. Нова можност за тестирање на апетитот на богатите ќе има на следната аукција на луксузни чанти организирана од Sotheby's.
Останува под знак прашалник до кога може да продолжи оваа висока потрошувачка. Флавио Цереда, аналитичар во Jefferies, вели дека и покрај позитивните резултати на LVMH, иднината е сè уште неизвесна. „Ова е уште еден победнички удар по пандемијата и не е сосема јасно дали сме сведоци на последното ура“, додаде тој.
.webp){kind=icon}
