Невидениот пораст на цените на најбараните половни луксузни часовници покажува знаци на смирување откако некои сопственици ги вратија во циркулација своите „Ролекс“ и „Патек Филип“ часовници за да можат да профитираат, покажува новиот индекс на платформата за тргување „Сабдајл“ (Subdial).
Индексот Subdial50, кој ги следи цените на глобалниот пазар за 50. најтргувани луксузни часовници по вредност, се намали за околу 6 отсто во изминатите 30 дена.
Часовник „Ролекс Дејтона“ (Rolex Daytona) со црна основа и референца 116500LN загуби 10 отсто од својата вредност за еден месец, иако сè уште е повисока за околу 19 отсто во изминатите 12 месеци. Спортскиот челичен часовник „Патек Филип Наутилус“ (Patek Philippe Nautilus 5711) со сина основа чија малопродажна цена на страницата изнесува околу 145.230 долари е намален за околу 12 отсто за 30 дена откако се зголеми за 44 отсто за 12 месеци, покажуваат податоците.
„Кај одредени модели имаше голем залет и тие се вратија на веројатно поразумна цена каде што е вистинската основна побарувачка“, рече во интервју Рос Крејн, ко-основач на Subdial и дата експерт кој помогнал во создавањето на индексот.
Сепак, индексот, кој вклучува часовници како Rolex Daytona, Datejust и Submariner, како и неколку референци на Patek Philippe Nautilus и еден „Одемар Пиге Ројал Оук“ (Audemars Piguet Royal Oak), е зголемен за околу 32 отсто во изминатите 12 месеци.
Bloomberg
Тоа ги става половните луксузни часовници пред многу други алтернативни инвестиции, вклучувајќи винтиџ автомобили (олдтајмери), злато и секако крипто валути, кои претрпеа голем пад во последните месеци. S&P 500 сега е подготвен за својата најлоша прва половина од 1970 година, шест години пред „Патек“ да го претстави својот прв „Наутилус“ (кој во тоа време се продавал за 3.100 долари).
Интересот за колекционерски винтиџ часовници се зголеми за време на пандемијата, бидејќи потрошувачите, полни со готовина, но заглавени дома, решија да си ги дозволат часовниците од соништата преку онлајн купување. Некои инвеститори кои заработија големи приноси во технолошки акции и крипто валути, гледаа на половните часовници како на следна атрактивна дестинација.
Цените за некои примероци на „Ролекс“, „Патек Филип“ и „Одемар Пиге“ се зголемија повеќе од двојно, бидејќи пазарот на кој претходно доминираа колекционери и луѓе на кои тоа им е хоби, одеднаш стана преплавен со нови купувачи. Откако „Патек“ го прекина производството на „Наутилус 5711“, цените за неговиот најпопуларен модел се зголемија до плафон.
Сега, со падот на технолошките акции и крипто вредностите и растот на каматните стапки, некои шпекуланти повторно ги продаваат своите часовници.
Онлајн платформата за продавање и тргување, исто така, создаде индекси на цени на часовници за следење на одредени брендови, како што се „Омега“, „Картие“, како и „Тудор“, сестрински бренд на „Ролекс“ кој промовира пониски цени. Податоците покажуваат дека половните „Омега“ часовници изгубиле околу 3 отсто за 30 дена, додека индексот на одредени „Картие“ часовници е маргинално зголемен, а цените на „Тудор“ се намалени за околу еден отсто.
.webp){kind=icon}
