Професионалните инвеститори се обложуваат дека може да се избегне рецесија и покрај сите предупредувања за спротивното. Тоа е опасен облог од повеќе причини.
Менаџерите што управуваат со пари ги фаворизираат акциите што се чувствителни на економските движења, како што се акциите на индустриските компании и производителите на суровини, според студија на Голдман Сакс (Goldman Sachs Group Inc.) за позиционирањето на заедничките и хеџ-фондовите со средства во вкупна вредност од речиси пет илјади милијарди долари. Акциите што вообичаено имаат добри резултати за време на економски пад, како што се комуналните услуги и основните потрошувачки производи, во моментот се непопуларни, покажува анализата.
Ваквите позиции одат во прилог на облозите дека Федералните резерви (ФЕД) можат да ја запрат инфлацијата без да предизвикаат рецесија, сценарио што е тешко остварливо и во економијата е познато како меко приземјување. Ризикот од ваквите облози беше особено евидентен во петокот и понеделникот, кога скоковите на пазарот на трудот, како и движењата во американскиот услужен сектор, доведоа до шпекулации дека политиката на ФЕД ќе треба да остане агресивна.
„Тековното однесување во секторот е во согласност со позиционирањето кон меко приземјување“, посочуваат стратезите на Голдман, додавајќи дека тематската и факторската изложеност на индустријата на фондови (тематските фондови избираат компании и сектори поврзани со одредена идеја - тема, додека фондовите базирани на фактори се приклонуваат кон специфични карактеристики на акциите) укажуваат на сличен став.
Goldman Sachs
Тоа не значи дека искусните инвеститори сакаат да прават поризични инвестиции. Всушност, годинава тие го зголемуваат фондот на готовина или прават надолни облози откако ФЕД ја започна својата најагресивна кампања против инфлацијата во последните децении. Меѓутоа, зад одбранбениот став се крие тенденцијата кон пазарна цикличност, која е во спротивност со загриженоста на инвестициската заедница дека на повидок е сериозен економски пад.
Во анкета на менаџери на фондови спроведена минатиот месец од страна на Банката на Америка (Bank of America Corp.), 77 отсто од нив очекуваат глобална рецесија во следните 12 месеци, што е највисок процент забележан од периодот кога се анализираа непосредните последици од избувнувањето на ковид-кризата во 2020 година.
Можно е професионалните инвеститори бавно да ги приспособуваат своите портфолија на економскиот ризик или да бараат заштита од рецесија со прибегнување кон други стратегии, како чување пари во готовина.
Поверодостојно објаснување е надежта дека ФЕД ќе може да спроведе меко приземјување. Во тој случај, лошите економски вести се сметаат за добри за пазарот, бидејќи покажуваат дека кампањата во борбата против инфлацијата на претседателот на ФЕД, Џером Пауел, успева и дека креаторите на политиката можат да го ублажат агресивното темпо на зголемување на каматните стапки.
Наративот, окарактеризиран како пресврт за ФЕД, е нашироко наведуван како причина поради која индексот S&P 500 е зголемен за повеќе од 10 отсто во однос на ниската вредност во октомври, и покрај влошувањето на податоците за домувањето, производството и процените за заработката.
Bloomberg
Сега се случува спротивното. Акциите се распродадоа во понеделникот, откако неочекуваниот раст во американскиот услужен сектор предизвика стравувања дека ФЕД можеби ќе мора да се придржува до построга монетарна политика. Индексот S&P 500 падна за 1,8 отсто, продолжувајќи ги загубите од петокот, кога извештајот за работните места, кој се покажа подобар од очекуваното, предизвика загриженост за политиката на ФЕД откако Пауел претходно навести можно забавување на темпото на затегнување.
„Ако растот нагло падне или се зголеми премногу, тогаш 'лошата вест ќе значи лошa вест' и тоа ќе доминира во наративот“, се вели во писмената белешка од понеделникот што ја достави тимот за продажба и тргување на ЏП Морган (JPMorgan Chase & Co). „Во вакво сценарио, пазарите веројатно повторно ќе ги тестираат ниските нивоа од 2022 година“.
.webp){kind=icon}
