Потресите на финансиските пазари се прелеаја на берзите

Фјучерсите на американските и европските акции ги избришаа добивките, а доларот флуктуираше, додека инвеститорите ги одмеруваа напорите да се заштити глобалниот банкарски систем. Двегодишните приноси на државните обврзници го вратија претходниот отскок.

Позитивните информации за договорот на УБС (UBS Group AG) за купување на „Кредит Суис“ (Credit Suisse Group AG) и потезите на централната банка за зајакнување на доларската ликвидност отстапија место за повнимателно расположение на пазарот.

 

 

Во такви пазарни околности, индексот S&P 500 го започна овонеделното тргување со минимална промена, откако во петокот затвори со минус од 1,1 отсто. Утрово речиси е непроменет и технолошкиот индекс Nasdaq 100, кој во петокот падна за 0,5 проценти.

Фјучерсите за европските акции ја започнаа неделава со загуба од 0,3 отсто. Црвенилото е присутно и кога станува збор за поголемите азиски индекси. Имено, јапонскиот индекс загуби 1,4 отсто  од вредноста, исто колку и австралискиот, додека хонгконшкиот индекс падна за 2,6 отсто. Единствената светла точка е во Кина, каде што индексот порасна за не многу значајни 0,1 отсто.

Показателот за вредноста на доларот се ниша помеѓу мали добивки и загуби. Валутите, вклучувајќи ги јенот, австралискиот и новозеландскиот долар паднаа во немирното тргување. Флуктуираа и швајцарскиот франк и еврото. Односот меѓу еврото и американскиот долар само малку се промени и тие се тргуваат по курс од 1,0667 долари за евро.

Трговците се обидуваат да го проценат следниот потег на американските Федерални резерви (ФЕД), во услови на неодамнешна финансиска нестабилност и помеко од очекуваното отчитување на податоците за инфлација. Голем дел од дебатата на пазарите сега е фокусиран на тоа дали ФЕД ќе испорача уште едно покачување за четвртина поен или ќе паузира на состанокот, кој треба да се одржи на 21 и 22 март. Трговците повеќе не гледаат многу шанси за поголемо зголемување, на пример од половина бод, што претседателот на ФЕД, Џером Пауел, го стави на маса непосредно пред да се појави загриженоста за финансиската стабилност.

Главниот инвестициски директор на „ЏП Морган“ (JPMorgan Asset Management), Боб Микеле, рече дека ефектите од квантитативното затегнување од страна на ФЕД почнале да загризуваат и дека сега е поуверен дека се движиме кон рецесија.

„Ова е сè уште почеток. Сигурно ќе се забави растот. Сигурно дека ќе ги намали инфлаторните притисоци. ФЕД не мора да ги зголемува стапките в среда. Пазарот ќе направи заострување на кредитите за нив“, рече тој за телевизијата „Блумберг“.

Креаторите на политиката брзаат да ја зајакнат довербата по падот на банката „Силикон валеј“ (СВБ) и проблемите во „Кредит Суис“, кои дополнително ја зголемија загриженоста за финансиската стабилност. Преземањето на „Кредит Суис“ од УБС, поддржано од Владата, се обидува да ги запре одливот на клиентите и масовното уништување на акциите и обврзниците.

Банката на федералните резерви и пет други централни банки најавија координирана акција за зајакнување на ликвидноста во аранжманите за размена на американски долари за да се олеснат оптоварувањата во глобалниот финансиски систем.

„Ќе биде потребно извесно време за да се сварат вестите за 'Кредит Суис'. Поширокиот пазар на акции останува релативно стабилен, прицврстен од конкурентните сили на кредитната контракција предизвикана од банкарската криза и потенцијалните стимулативни ефекти на полесната политика“, рече Чамат де Силва, висок менаџер за портфолија за „Бета шеарс“ (BetaShares Holdings).

На другите пазари вредноста на златото падна за 0,8 проценти и сега унца се тргува по цена од 1.973,56 долари.

Негативната слика е присутна и на криптопазарот, каде што најголемиот токен, биткоинот, падна за 1,8 отсто, на 27.461,25 долари, а етерот загуби 2,4 отсто од вредноста и сега чини 1.756,34 долари.