Иако минатата година беше една од најтешките за инвеститорите, за берзите во регионот беше поуспешна од 2021 година од деловна гледна точка. Најголемиот дел од берзите ги зголемија приходите, но и трошоците, особено тие за работната сила. Сепак берзите работеле во позитива, а најголема добивка оствари Македонската берза, која во исто време има и најмал промет.
Вкупните приходи на Македонската берза лани изнесувале речиси 900 илјади евра, што е половина од оние на Љубљанската берза. Таа остварила добивка од 106 илјади евра, што е само малку повеќе од Бањалучката берза, која има и многу помали приходи од Љубљанската берза.
Македонската берза лани имаше расходи од 690 илјади евра, а оперативната добивка пред амортизација (ЕБИТДА) изнесуваше повеќе од 200 илјади евра. Во исто време, нето-добивката достигна 187 илјади евра, што е, на пример, двојно повеќе од нето-добивката на Загрепската берза.
„За Македонската берза изминатата 2022 година, и покрај намалениот обем на тргување, беше успешна година. Наедно, 2022 година може да се окарактеризира и како година на преземања – како поради зголемувањето на сопственичкото учество на Загрепската берза во Македонската, така и поради влезот на Македонската берза во Централниот депозитар за хартии од вредност (ЦДХВ), каде што таа стана најголем поединечен акционер co околу 20 отсто. Финансиските перформанси на берзата, иако намалени во однос на претходната година, се доста добри. Ова примарно се должи на ефикасното управување со трошоците, вклучувајќи и на синергиите од воспоставениот заеднички информативен центар со Депозитарот, како и од остварувањето определени нови приходи“, велат од Македонската берза за „Блумберг Адрија“.
Највисоки приходи лани остварила Загрепската берза, кои се зголемени за речиси една десеттина, на 3,7 милиони евра. „Растот е резултат на зголемениот промет на хартии од вредност, новите котирања и зголемувањето на другите приходи“, се објаснува во извештајот. Другите оперативни приходи се зголемени за седум отсто.
Како и приходите, повисоки се и трошоците, кои лани биле седум отсто повисоки од 2021 година. Тие изнесуваат 3,5 милиони евра, додека нето-добивката изнесува 85 илјади евра. Оперативната добивка пред амортизација изнесува 440 илјади евра, што претставува зголемување од 16,6 отсто во однос на 2021 година.
Љубљанската берза ги зголеми приходите за 15 отсто
Лани вкупните приходи на Љубљанската берза биле за 15,5 отсто повисоки во однос на истиот период во 2021 година и достигнале 1,7 милион евра. Од нив, 1,15 милион евра приходи се однесуваат на приходи од берзански провизии, приходи од членарини и приходи од котација на хартии од вредност. Овде приходите од берзански провизии изнесуваат 610 илјади евра и учествуваат со 34,6 отсто во сите приходи.
Вкупните расходи изнесуваат 1,6 милион евра, што е за 11,7 отсто повеќе во однос на истиот период лани. Оперативната добивка пред амортизација (EBITDA) лани била за 16 отсто поголема во споредба со 2021 година и изнесувала 209.095 евра.
Љубљанската берза очекува дека оваа година деловното работење ќе се одвива во малку подобрена, но сè уште нестабилна и неизвесна средина. „Ковид-19 веќе стана наша реалност, така што очекуваме најголемите ризици да доаѓаат од полоши економски услови“, се наведува во извештајот. Во овие услови, берзата планира да го зголеми обемот на приходи од менувачки провизии на 729.540 евра, а добивката пред оданочување на износ од 141.765 евра.
Белградската берза по две години повторно е во позитива
По две години, Белградската берза лани забележа позитивен финансиски резултат, со нето-добивка од нешто под 11.000 евра. За тоа помогна значителното зголемување на приходите од провизии за тргување со хартии од вредност. „Постигнатиот резултат е одраз на неликвидноста на пазарот, бидејќи приходите од провизии за тргување имаат големо влијание врз финансискиот резултат на берзата. За тоа придонесе и оптимизацијата на трошоците“, се објаснува во извештајот.
Вкупните приходи надминаа 800.000 евра, што е за речиси 40 отсто повеќе од 2021 година. Најголем дел од приходите имаат провизиите за котација и провизиите за склучените зделки. Бројот на членовите на берзата не е променет во 2022 година, а приходите од членство се остварени според очекуваниот обем.
Вкупните расходи се за 6,4 отсто помали од планираните и 2,6 отсто пониски во однос на 2021 година. Во структурата на вкупните расходи доминираат трошоците за плати и надоместоци на вработените.
Бањалучката берза со ниски приходи и високи профити
Бањалучката берза е на третото место во регионот Адрија по промет, а вкупните приходи лани изнесувале 625.000 евра, што е за нешто над 100.000 евра повеќе од Сараевската берза, која лани имаше најниски приходи во регионот.
Во однос на нето-добивката, Бањалучката берза може да се спореди со Љубљанската берза, бидејќи оствари добивка од 100.000 евра, што е само нешто помалку од Љубљанската берза. Лани вкупните трошоци изнесуваа 440 илјади евра, а добивката пред амортизација достигна 220 илјади евра.
Со помош на Александра Томиќ и Светлана Шурлан
.webp){kind=icon}
Во моментов нема коментари за веста. Биди прв да коментира...