Инвеститорите очекуваат ЕЦБ да предводи во намалување на стапките

Инвеститорите се обложуваат дека Европа ќе ги предводи најголемите централни банки во светот во намалување на каматните стапки, бидејќи една од најстрогите претставнички на ЕЦБ го опиша забавувањето на инфлацијата како охрабрувачко.

Пазарите проценуваат речиси 90 отсто шанси Европската централна банка да започне со намалување на стапките во првиот квартал на следната година, сценарио што едвај се разгледуваше пред само три недели. Сега се очекуваат пет намалувања од четвртина поен, плус 80 проценти шанса и за шесто намалување, кои заедно би ја намалиле основната стапка за 150 базични поени, на 2,5 отсто.

Додека пазарите низ светот се обложуваат на натамошно намалување на каматните стапки, тој став доби дополнително влијание во Европа во вторникот, откако Изабел Шнабел од ЕЦБ рече дека инфлацијата покажува „забележително“ забавување и дека е „малку веројатно“ уште едно зголемување на трошоците за задолжување. Пазарите долго време ја намалуваат можноста за дополнително затегнување, но Шнабел предупреди дека е премногу рано да се отфрлат нови покачувања.

Изабел Шнабел Bloomberg

Ако трговците се во право, ЕЦБ ќе биде првата од главните централни банки што ќе ги намалат стапките следната година и ќе го направи најголемото намалување на каматите досега. Сепак, некои од најголемите имиња на Волстрит веќе предупредуваат дека очекувањата за намалување на стапките од страна на централните банки низ светот изгледаат претерани.

Банката на федерални резерви (Фед) се очекува да ги намали стапките за првпат во мај, и тоа за вкупно 125 базични поени. Во Обединетото Кралство пазарите во моментов очекуваат три намалувања на каматните стапки за по четврт поен од страна на Банката на Англија (БоЕ) почнувајќи од јуни, како и 30 отсто шанси за четврто намалување. Пред еден месец очекуваа само две кратења.

Пазарите во Австралија претходно се обложија на уште едно зголемување на каматните стапки до средината на 2024 година, а сега даваат над 75 отсто шанси за едно намалување дотогаш. Дури и централната банка на Нов Зеланд, која минатата недела рече дека можеби ќе треба да ги зголеми стапките следната година, сега се очекува да ја намали својата референтна стапка до мај.

Перцепциите дека големите централни банки ќе треба да ги олеснат монетарните услови следната година за да го поттикнат економскиот раст ги поттикнаа обврзниците, со што ноември стана рекорден месец. Приносите на 10-годишните американски и германски обврзници паднаа за повеќе од 45 базични поени во текот на изминатиот месец.

Иако ефективно исклучи уште едно зголемување на каматните стапки, во однос на потенцијалното намалување Шнабел рече дека „треба да бидеме внимателни во давањето изјави за нешто што ќе се случи за шест месеци“. Нејзиниот колега, хрватскиот гувернер Борис Вујчиќ ја отфрли можноста за намалување во блиска иднина, додека Франсоа Вилерој де Галхау рече дека ЕЦБ ќе го испита дури во одреден момент во текот на 2024 година.

Борис Вујчиќ Bloomberg 

Претпазливоста расте и на Волстрит, а стратезите на „Блекрок“ (BlackRock Inc.) во вторникот посочија дека оние што се надеваат можеби ќе бидат разочарани. Стратезите во „Голдман Сакс“ (Goldman Sachs) препорачуваат облози на опции за да се спротивстават на превисоките цени, а главниот економски советник на „Алијанц“ (Allianz), Мохамед Ел-Еријан, предупреди дека Фед ја губи контролата врз пораките што ги испраќа.

„Верувам дека Фед заврши со зголемувањето на каматните стапки, но мислам дека тоа не го потврдува она што владее на пазарите во однос на намалувањето на стапките следната година“, изјави Ел-Еријан за радиото „Блумберг“ во вторникот.

Во моментов нема коментари за веста. Биди прв да коментира...

Остави коментар