Потонаа акциите од автомобилскиот сектор - каде се можностите?

Американскиот претседател Доналд Трамп ги откри долгонајавуваните царини што ги потресоа светските берзи. Автомобилите со царини од 25 проценти се повеќе оданочени од другите производи од Европската Унија (ЕУ), Јапонија и Кина. Нема сомнеж дека царините ќе ги поскапат автомобилите за Американците, но индиректно ќе бидат погодени странските производители, кои се соочуваат со пад на продажбата. Како се движат вредностите на акциите на производителите на автомобили и што мислат аналитичарите за акциите?

И без царините, автомобилските компании веќе се во неволја

Акциите на производителите на автомобили ја губат вредноста во последните години. Причини има многу: намалување на продажбата, помала профитабилност поради инвестициите во електрични возила (ЕВ), високите цени на енергијата, кинеската конкуренција, а листата продолжува. Автомобилските акции генерално беа во минус, со неколку исклучоци. „Порше“ (Porsche) се расправа со електрични возила и оладениот пазар на Кина. БМВ (BMW) е погоден од повлекување дел од возилата поради проблеми со сопирачките. Нема потреба да се трошат зборови за проблемите на „Фолксваген“ (Folkswagen). Концернот избегна затворање фабрики, но постигна договор со синдикатот и со вработените за кратење.

По исклучителната година, „Стелантис“ (Stellantis) лани падна во криза. Поради високите цени, продажбата во САД опадна, а со тоа и профитот. Карлос Таварес, кој ја водеше групацијата од нејзиното создавање и управуваше со брендот „Пежо“ (Peugeot) од 2014 година, мораше да поднесе оставка како извршен директор. Исклучок се „Ферари“ (Ferrari) и „Тесла“ (Tesla). Инвеститорите на „Тесла“ не гледаат како на традиционална автомобилска компанија, туку како на технолошка компанија. „Ферари“ вешто ги избегна повеќето проблеми во индустријата. Продажбата уриваше рекорди неколку години по ред, маржите се чудесни, купувачите се подготвени да издвојат вртоглави суми за своите автомобили. Во Маранело знаат како да го искористат тоа.

Акциите на „Ферари“ се единствените од европските производители на автомобили што беа во зелено во изминатата година. Пораснаа за два отсто. Највисоката точка ја достигнаа во февруари, но со заканата од трговска војна и тие го губат тлото под себе. Се издвојува и „Рено“ (Renault), кој загуби околу пет проценти во последната година. Компанијата „Рено“ не е толку чувствителна на царините бидејќи не продава ниту извезува автомобили во САД.

Болни ИПО на „Волво“ и на „Порше“

Акциите на остатокот од европските автомобилски гиганти се длабоко во црвено. Во последната година најмногу загуби акцијата на „Стелантис“ – околу 60 отсто, а потоа следуваат „Порше“ со повеќе од 50 отсто и „Волво“ (Volvo) со пад од речиси 50 проценти. Во последниот месец поради заканата од царини најмногу паднаа акциите на „Мерцедес“ (Mercedes-Benz), „Волво“ и „Порше“.

Последните две споменати компании во последните години почнаа да котираат на берзата. Нивните акции се покажаа многу лошо во однос на нивната првична понуда. Акциите на „Порше“ загубија 44,5 отсто од својата вредност од нејзината првична јавна понуда во септември 2022 година, а „Волво“ првпат ѝ понуди акции на јавноста во октомври 2021 година и оттогаш изгуби речиси 63 отсто од својата вредност.

Во Азија се издвојува еден бренд

Азиските производители, општо земено, претрпеа помал пад на акциите. Меѓу анализираните, само еден производител порасна во последната година. Во 2025 година акцијата на кинеската БЈД (BYD) нагло скокна. Воведувањето царини предизвика пад на акциите за околу 15 отсто, но од април минатата година порасна дури за 89 отсто. Кај преостанатите, најмалку загуби акцијата на „Хјундаи“ (Hyundai). Во последната година загуби околу една десеттина од својата вредност.

И „Нисан“ (Nissan) е во опасност. Акцијата падна речиси за 40 отсто. Забележливо опаѓа продажбата, а со тоа и деловните резултати. Висок функционер близок до „Нисан“ во ноември изјави дека брендот има само 12-14 месеци да најде нов инвеститор. Како спас се споменуваше спојувањето со „Хонда“ (Honda), но тоа падна во вода.

Американскиот пазар е важен за голем дел од европските и јапонските автомобилски компании бидејќи таму се продаваат поскапи и поголеми автомобили. Царините се дополнителен удар за индустријата, која се бори на неколку фронта.

Што велат аналитичарите?

Аналитичарите гледаат повеќе можности за автомобилските компании во Азија отколку во Европа. Од наведените автомобилски компании, најголем дел од аналитичарите, од вкупно 33 аналитичари 97 проценти препорачуваат купување акции на „Хјундаи“. По корејската компанија следува кинеската БЈД, за која 87,5 отсто од аналитичарите препорачуваат купување. Потоа изборот паѓа на „Хонда“ со 71 отсто од 15 аналитичари што препорачуваат купување. Најперспективна акција меѓу европските производители на автомобили е таа на „Рено“. Купување на оваа акција препорачуваат 70,8 отсто од 17 аналитичари.

 

Од друга страна, повеќето аналитичари препорачуваат продажба на акции на „Нисан“ - тоа го прават 44 отсто од аналитичарите на „Блумберг“. Повеќето аналитичари препорачуваат поседување акции во „Волво“, „Стелантис“ и „Порше“.