Индексот S&P 500 паѓа по скокот од 8,6 трилиони долари од априлскиот минимум

Растот на Волстрит вчера забави, а акциите паднаа додека трговците чекаа нови катализатори по шестдневниот период што го доведе индексот S&P 500 до пораст од речиси 20 проценти во однос на најниската вредност во април.

Американската референтна вредност на акциите го изгуби интензитетот по скокот од 8,6 трилиони долари на „прекупени“ нивоа. Падот на нејзината највлијателна група - големите технолошки компании - влијаеше врз тргувањето, при што „Алфабет“ (Alphabet Inc.) падна за 1,5 отсто, и тоа среде конференцијата за програмери на компанијата. „Тесла“ (Tesla Inc.) беше единствената мегакапитализирана компанија со раст бидејќи Илон Маск рече дека е посветен на водење на гигантот за електрични возила.

Bloomberg

 

Приносите од долгорочните државни обврзници пораснаа бидејќи преговорите за буџетот на САД се нестабилни и го задржаа фокусот на растот на дефицитот. Претседателот Доналд Трамп е сè повеќе фрустриран од барањата за значително зголемување на ограничувањето на државниот и локалниот даночен одбиток, според висок функционер на администрацијата, сигнализирајќи застој додека републиканците имаат цел брзо да го усвојат законот за големото намалување на даноците.

И покрај падот на акциите, мај се чини изненадувачки силен за индексот S&P 500. Пазарите се смирија по повеќемесечни превирања бидејќи растат надежите дека царинскиот блесок на Трамп ќе биде помалку сериозен од очекуваното. Сепак, инвеститорите ги анализираат графиконите барајќи индиции дали напредокот може да продолжи.

„Нема сомнение дека замавот на пазарот на акции е доста силен. Сепак, пазарот е преоптоварен на краток рок, па затоа може да дојде до пауза во секое време“, рече Мет Малеј од „Милер табак“ (Miller Tabak). „Меѓутоа, освен ако таа пауза не се покаже како сериозен пресврт, повторно тестирање на тие историски максимуми наскоро е многу можно“.

Индексот S&P 500 падна за 0,4 проценти, исто колку што процентуално се намали и Nasdaq 100, додека индексот Dow Jones Industrial Average изгуби 0,3 отсто од вредноста.

Приносот на 10-годишните државни обврзници порасна за три базични поени, на 4,48 проценти. Доларот се намали за 0,2 отсто.

Bloomberg

 

Ризиците како што се неизвесноста со царините, слабеењето на економските податоци и неповолните фискални околности ја доведуваат во прашање одржливоста на неодамнешното закрепнување на акциите, напишаа во белешка стратезите на „ЏП Морган Чејс“ (JPMorgan Chase & Co.), вклучувајќи го и Тони С.К. Ли.

„Очекуваме нестабилност во иднина бидејќи инвеститорите се соочуваат со неизвесност на неколку фронта“, рече Солита Марчели од „УБС Глобал велт менаџмент“ (UBS Global Wealth Management). „Се чини дека е потребен натамошен напредок за да траат трговските договори. Намалувањата на даноците на Трамп би можеле да додадат притисок врз пазарот на обврзници. Федералните резерви веројатно ќе се спротивстават на намалувањето на стапките во блиска иднина додека економските неповолности се зголемуваат“.

Претседателот на Федералните резерви (Фед) на Сент Луис, Алберто Мусалем, рече дека царините веројатно ќе ја оптоварат американската економија и ќе го ослабат пазарот на трудот. Мусалем рече дека Фед може да даде „избалансиран одговор“ и на инфлацијата и на вработеноста сè додека перспективите на Американците за идните цени остануваат закотвени на целта на централната банка од два отсто.

Бунтот на пазарот на обврзници против фискалната дарежливост на Вашингтон е далеку од завршен, според Тим Магнусон од „Гарда капитал партнерс“ (Garda Capital Partners), кој вели дека брзото зголемување на приносите е веројатно единственото нешто што ќе го мотивира Конгресот да го ограничи дефицитот.

„Пазарот на обврзници ќе го има последниот збор за тоа што ќе се случува во фискалниот сегмент“, рече Магнусон во интервју направено во корпоративната канцеларија во Њујорк.

Во меѓувреме трговците со валутни опции се попесимистични од кога било во врска со патот на доларот во текот на следната година, според една често цитирана мерка за расположението на инвеститорите.