Бафет го намали уделот во банкарски акции, а акциите на неговиот „Беркшир“ солидно пораснаа

„Беркшир Хатавеј“ (Berkshire Hathaway Inc.) на Ворен Бафет не направи големи купувања за време на падот на пазарот што ѝ претходеше на трговската војна на претседателот Доналд Трамп. Наместо тоа, ги намали или продаде своите удели во финансиски акции во текот на првиот квартал.

Во последната година од неговиот мандат како извршен директор на „Беркшир“, Бафет ја напушти својата позиција во „Ситигруп“ (Citigroup Inc.), според вчерашниот поднесок до регулаторот. Фирмата исто така го намали својот удел во „Капитал уан фајненшл“ (Capital One Financial Corp.), како и својот долгогодишен удел во Банката на Америка (Bank of America Corp.).

Бафет (94) започна да го намалува својот удел во Банката на Америка во јули минатата година, без да даде некакво објаснување за потегот. Тој сега поседува 8,3 отсто од американскиот заемодавец и повеќе не е негов најголем акционер, според податоците на „Блумберг“.

Конгломератот исто така го напушти својот удел во бразилската „Нубанк“ (Nubank), која од своето основање во 2013 година прерасна во една од најголемите дигитални банки во светот. „Беркшир“ купи удел од 500 милиони долари пред банката да излезе на берза во 2021 година. Акциите оттогаш пораснаа за 46 отсто.

Бафет главно се воздржуваше од големи аквизиции во последните години, а наместо тоа создаде готовина што до крајот на март достигна речиси 350 милијарди долари. На годишниот состанок на конгломератот месецов милијардерот рече дека неодамнешниот пад на пазарот „навистина не е ништо“, посочувајќи на времињата во историјата на „Беркшир“ кога акциите на неговата компанија изгубија половина од својата вредност во кратки временски периоди.

На состанокот Бафет рече дека неговата фирма неодамна била „доста блиску“ до тоа да потроши 10 милијарди долари за некој договор, но на крајот одлучила да не го стори тоа.

Акциите на „Беркшир“, компанија со седиште во Омаха, Небраска, годинава се зголемија за повеќе од 11 проценти. Во истиот период индексот S&P 500 порасна за помалку од еден отсто.

Бафет го зголеми својот удел во „Констелејшн брендс“ (Constellation Brands Inc.), кој сега изнесува вкупно 6,6 отсто – или околу 2,2 милијарди долари – удел од дистрибутерот на алкохол. Тој во првиот квартал купи и повеќе акции на „Сириус“ (Sirius XM Holdings Inc.) и „Оксидентал петролеум“ (Occidental Petroleum Corp.). Покрај тоа, компанијата побара третман на доверливост од Комисијата за хартии од вредност, што значи дека на „Беркшир“ ѝ беше дозволено да изостави еден или повеќе удели во својот поднесок од четвртокот.

Неговиот удел во „Епл“ (Apple Inc.) остана недопрен во тој период и сè уште претставува највреден удел во портфолиото на милијардерот.

Бафет планира да се повлече од функцијата претседател на крајот од годината. Тој го изгради „Беркшир“ во бизнис вреден повеќе од 1,1 трилион долари, при што поединци, како и професионалци, внимателно ги следат, а понекогаш и ги имитираат неговите инвестициски потези.